जनकपुरधाम, २२ कार्तिक । मधेश प्रदेशसभामा शनिबार एक अनौठो र प्रतीकात्मक घटना घट्यो । नेकपा माओवादी केन्द्रका सांसद रहबर अन्सारीले सदनको रोस्ट्रममा उभिएर भाषणकै क्रममा आफ्नै मुखमा मोसो दलेका हुन् ।

सांसद अन्सारीले प्रदेशमा बनेका कुनै पनि सरकारले जनताको पक्षमा काम गर्न नसकेको आरोप लगाउँदै राजनीतिक नेतृत्व र प्रणालीप्रति गहिरो असन्तुष्टि व्यक्त गरे । उनले आफू पनि प्रदेशसभा सदस्य भएर पनि जनताको आवाज प्रभावकारी रूपमा बोल्न नसकिएकोमा आत्मग्लानी भएको बताए ।

‘जबसम्म यो प्रदेशमा जनताको पक्षमा काम गर्ने सरकार बन्दैन, तबसम्म म पनि दोषी छु,’ अन्सारीले भनेपछि उनले सबैको सामु आफ्नो मुखमा मोसो दले ।

उनले उक्त कदमलाई सार्वजनिक अपराधको प्रतीकात्मक स्वीकारोक्ति बताउँदै भने, ‘म पनि यस अन्यायपूर्ण प्रणालीको हिस्सा भएको अपराधी हुँ ।’

अन्सारीको यस कार्यले सदनमा केही क्षण हलचल मच्चियो । केही सांसदहरूले उनको कदमलाई राजनीतिक असन्तुष्टिको चरम अभिव्यक्ति भनेका छन् भने कतिपयले यसलाई सभाको मर्यादाविपरीत रहेको टिप्पणी गरेका छन् ।

प्रदेशसभा सचिवालयका स्रोतका अनुसार घटनापछि सभामुख रामचन्द्र मण्डलले सदनमा अनुशासन कायम राख्न आग्रह गर्दै आगामी बैठकमा यस्ता कार्य दोहोरिन नदिन सबै सांसदलाई सचेत गराएका छन् ।