जनकपुरधाम, २२ कार्तिक । मधेश प्रदेशमा शनिबार राजनीतिक वातावरण अत्यन्तै तनावपूर्ण बनेको छ । मुख्यमन्त्री जितेन्द्र प्रसाद सोनलले पदबाट राजीनामा दिने घोषणा गरेलगत्तै उनको समर्थक समूहले प्रदेशसभाभित्रै सभामुख रामचन्द्र मण्डलविरुद्ध तीव्र नाराबाजी गरेका छन् ।

स्रोतका अनुसार बिहानै बिना रोकटोक प्रदेशसभा भवनमा प्रवेश गरेका सोनल समर्थक सांसदहरू मुख्यमन्त्रीसँगै सदनबाट बाहिरिँदै सभामुखविरुद्ध ‘सभामुखको एकलौटी निर्णय बन्द गर’ जस्ता नारासहित विरोध प्रदर्शन गरेका थिए ।

प्रदेशसभाभित्र सुरक्षा व्यवस्था कडा पारिए पनि प्रहरी परिचालन हुनु अघि नै उनीहरू सभा भवनमा प्रवेश गरेका थिए । उनीहरूले सभामुख मण्डलको कार्यशैलीलाई पूर्वाग्रही र मनपरी भन्दै आपत्ति जनाए ।

पाँच दलका नेताहरूले सभामुखले कार्यसूचीको उल्लङ्घन गर्दै सांसद रहबर अन्सारीलाई बोल्ने अवसर दिएको घटना विवादको मुख्य कारण बनेको बताएका छन् । उनीहरूको भनाइमा सभामुखको उक्त निर्णयले सदनको प्रक्रियागत निष्पक्षता तोडेको र त्यसकै परिणामस्वरूप राजनीतिक संकट उत्पन्न भएको हो ।

मुख्यमन्त्री सोनलले पनि सभामुखको व्यवहारकै कारण आफूले राजीनामा दिनुपरेको बताउँदै संघीयताको मूल आत्मामाथि प्रहार भएको टिप्पणी गरे ।

‘संघीयताको यात्रा मधेशबाट सुरु भएको हो । तर, अहिले सभामुखको पूर्वाग्रही कार्यशैलीले यही प्रदेशमा संघीयता नै संकटमा परेको छ,’ सोनलले भने ।