जनकपुरधाम, २२ कार्तिक । विश्वासको मत पाउनेमा पूर्ण विश्वस्त देखिएका मधेश प्रदेशका मुख्यमन्त्री जितेन्द्र प्रसाद सोनल अन्तिम क्षणमा अप्रत्याशित समीकरण बिग्रिएपछि राजीनामा दिन बाध्य भएका छन् ।

प्रदेशसभा बैठक सुरू हुनुअघि आत्मविश्वासका साथ सदन पुगेका सोनलको अनुहारमा मुस्कान देखिँदै थियो । तर, विश्वासको मतका लागि आवश्यक समर्थन अन्तिम समयमा कमजोर भएपछि उनी राजनीतिक रूपमा घेरिँदै गए ।

मुख्यमन्त्री सोनलले जनमत पार्टीका दुई सांसद सतिश कुमार सिंह र त्रिभुवन साह सभामा आउनेमा ढुक्क थिए । तर, दुबै अनुपस्थित रहँदा उनको गणित हल्लियो ।

त्यसैगरी, संघीय समाजवादी पार्टीकी सांसद बिमला अन्सारीले बिहानसम्म विश्वासको मत दिने बताएकी थिइन् । तर, बैठकमा उपस्थित नभएपछि सोनलको आत्मविश्वास घट्दै गएको स्रोत बताउँछन् ।

सोनलले माओवादी केन्द्रका असन्तुष्ट सांसदहरूलाई एक ढिक्का बनाउन अन्तिम प्रयास गरे पनि सांसद रहबर अन्सारी र माला कुमारी कर्णले खुला रूपमा विद्रोह घोषणा गरेपछि उनको सरकार संकटमा परेको थियो ।

बैठक स्थगित गराउने रणनीति बनाउँदै उनले मन्त्रिपरिषद्का केही सदस्यसँगै सदनबाट बाहिरिने निर्णय गरे । तर, असन्तुष्ट पक्षलाई मनाउने प्रयास असफल रह्यो । बैठक पुनः सुरु भएपछि पनि सोनलले स्थगित गर्ने दाउ हाले तर सम्भव नदेखिएपछि उनले राजीनामा घोषणा गरे ।

बैठक १० मिनेटका लागि स्थगित भएपछि सदन परिसरमा विवाद र तिक्तता फैलिएको थियो । जसपा नेपालकी सांसद सुरिता कुमारी साहले नेकपा एमालेका संसदीय दलका नेता सरोजकुमार यादवतर्फ इङ्गित गर्दै बाँधेर कुट्नुपर्छ भनेपछि दुवै पक्षबीच मौखिक झडपको अवस्था सिर्जना भएको हो ।

विवाद बढ्दै गएपछि सभामुखले सुरक्षा व्यवस्था कडा पार्न निर्देशन दिएका थिए । सत्ता र प्रतिपक्षी सांसदबीचको तिक्तता बैठक पुनः सुरु भएपछि पनि कायम रहेको देखियो ।

मुख्यमन्त्री सोनलले विश्वासको मत लिइरहँदा चार जना प्रदेशसभा सदस्य अनुपस्थित रहे ।

त्यसमध्ये जनमत पार्टीका सांसद सतिश कुमार सिंह र त्रिभुवन साह, संघीय समाजवादी पार्टीकी बिमला अन्सारी तरन्नुम र राप्रपाकी कञ्चन बिच्छा बैठकमा उपस्थित थिएनन् ।

सिंह र साहले जनमत पार्टी विभाजनपछि बनेको जनस्वराज पार्टीमा सनाखत गरिसकेका छन् । तर, सर्वोच्च अदालतको अन्तरिम आदेशका कारण कानुनी रूपमा अझै जनमतमै रहेका छन् ।

संघीय समाजवादीकी अन्सारी र राप्रपाकी बिच्छा पार्टीको निर्णयअनुसार तटस्थ बसेका थिए । अन्सारीले भने बिहानसम्म सोनललाई समर्थन गर्ने संकेत दिएकी थिइन् । तर, अन्तिम क्षणमा अनुपस्थित रहिन् ।

मुख्यमन्त्री सोनलले आफू विश्वासको मत पाउनेमा ढुक्क रहेको विश्वासका साथ सदन प्रवेश गरे पनि अन्तिम क्षणमा दलगत असन्तुष्टि, अनुपस्थित सांसद र विद्रोहले सत्ता समीकरण पूर्ण रूपमा उल्टाइदियो ।