जनकपुरधाम, २१ कार्तिक । मधेश विश्वविद्यालयमा कानून संकायका विद्यार्थीहरूले अध्ययन वातावरणमा देखिएको बेथितिको चाङ लिएर मुख्यमन्त्री जितेन्द्र प्रसाद सोनललाई भेटेका छन् । विद्यार्थीहरूले विश्वविद्यालयको साख र गुणस्तर जोगाउन आवश्यक कदम चाल्न मुख्यमन्त्रीसँग आग्रह गरेका हुन् ।

प्रेस सल्लाहकार कामरेन्द्र वर्मा ‘गौरव’का अनुसार विश्वविद्यालयका विभिन्न सेमेष्टरमा अध्ययनरत विद्यार्थीहरूले कुलपति र प्रशासन पक्षमा देखिएका समस्या र असुविधाहरू मुख्यमन्त्री सोनललाई जानकारी गराएका थिए ।

विद्यार्थीहरूले विश्वविद्यालयमा सम्बन्धित विषयको ज्ञान नभएका कर्मचारीहरूको नियुक्ति, उपकुलपति र रजिष्ट्रारको समयको अभाव, शिक्षण प्रणालीको असंरचनात्मकता, छात्राहरूको लागि पर्याप्त शौचालय सुविधा नहुनु लगायतका गम्भीर मुद्दा उठाएका छन् ।

मुख्यमन्त्री सोनलले जवाफमा शनिबारसम्म सैद्धान्तिक प्रक्रियामा व्यस्त रहेको कारण तत्कालै ठोस कदम चाल्न नसकेको तर प्रक्रियापछि विश्वविद्यालयका समस्याहरूको समाधानमा पहल गरिने बताएका छन् ।

उनले विद्यार्थीहरूलाई विश्वविद्यालयको साख घट्नेगरी कुनै पनि विवादास्पद कदम नलिन अनुरोध गर्दै व्यवस्थापन, सरकार र विद्यार्थी मिलेर समस्या समाधान गर्नुपर्नेमा जोड दिएका छन् ।