जनकपुरधाम, २१ कार्तिक । मधेश प्रदेशका मुख्यमन्त्री जितेन्द्र प्रसाद सोनलले भाषाको संरक्षण र विकासका लागि त्यसलाई जनजीविकासँग जोडेर अघि बढाउनुपर्ने आवश्यकता औंल्याएका छन् ।

शुक्रबार नेपाल इङ्ग्लिश ल्याङ्ग्वेज टिचर्स एसोसिएसनले आयोजना गरेको राष्ट्रिय सम्मेलनलाई सम्बोधन गर्दै मुख्यमन्त्री सोनलले विश्वका थुप्रै भाषा जनजीविकासँग नजोडिएका कारण लोप हुँदै गएको उल्लेख गरे ।

उनले भने, ‘हाम्रा परम्परागत भाषा, संस्कृति र सभ्यताका रूपहरू जीविकासँग जोडिएनन् भने दीगो बन्न सक्दैनन् ।’

मुख्यमन्त्री सोनलले अङ्ग्रेजी भाषा अहिले विश्वव्यापी रूपमा प्रभावकारी सञ्चार माध्यम बनेको स्वीकार गर्दै विद्यार्थीहरूले अङ्ग्रेजी सीपसँगै आफ्ना मौलिक भाषा, संस्कृति र परम्पराको ज्ञान पनि सँगसँगै विकास गर्नुपर्नेमा जोड दिए ।

उनले सामुदायिक विद्यालयहरूमा अङ्ग्रेजी विषयको अध्यापन स्तर सन्तोषजनक नभएको उल्लेख गर्दै त्यसमा सुधारका लागि सरकारले आवश्यक सहयोग र प्रशिक्षण कार्यक्रमलाई प्राथमिकतामा राख्ने बताएका छन् ।

मुख्यमन्त्री सोनलका अनुसार भाषा, संस्कृति र शिक्षाको सन्तुलित विकासले मात्र समाजलाई दिगो र पहिचानसहित अघि बढाउन मद्दत पुर्याउँछ ।