जनकपुरधाम, २० कार्तिक । मधेश प्रदेशमा हाल तीव्र बनेको स्वास्थ्यकर्मी आन्दोलनप्रति एशोसिएशन अफ प्राइभेट हेल्थ इन्स्टिच्युसन अफ नेपालले गम्भीर ध्यानाकर्षण जनाउँदै स्वास्थ्य सेवाको संवेदनशीलता बुझ्दै काममा फर्किन स्वास्थ्यकर्मीहरूलाई अपिल गरेको छ ।

संगठनले संघीय सरकारले गठन गरेको पारिश्रमिक अध्ययन समितिको निष्कर्षसम्म पर्खिन आग्रह गरेको हो ।

संघीय स्वास्थ्य तथा जनसंख्या मन्त्रालयले कार्तिक १६ गते सार्वजनिक गरेको विज्ञप्तिमा प्रा. डा. श्रीकृष्ण श्रेष्ठको संयोजकतामा अस्पताल वर्गीकरण तथा पारिश्रमिक कार्ययोजना तयार गर्ने समिति गठन गरेको थियो । सो समितिले एक महिनाभित्र स्वास्थ्यकर्मीको पारिश्रमिक सम्बन्धी नीति तथा कार्ययोजना तयार पार्ने उल्लेख छ ।

एशोसिएशन अफ प्राइभेट हेल्थ इन्स्टिच्युसन अफ नेपालका अध्यक्ष डा. एस. के. सिंहले जनकपुरधाममा आयोजित पत्रकार सम्मेलनमा भने, ‘निजी अस्पतालहरू सञ्चालनमा ल्याउन र गुणस्तरीय स्वास्थ्य सेवा जनतासम्म पुर्याउन स्वास्थ्यकर्मीहरूको भूमिका अमूल्य छ । उनीहरूको सम्मानजनक पारिश्रमिक पाउने हक स्वाभाविक हो । तर, आन्दोलनका कारण सेवा अवरुद्ध हुँदा सर्वसाधारण नागरिक प्रभावित भइरहेका छन् । यो हाम्रो साझा उद्देश्यविपरीत हो ।’

डा. सिंहका अनुसार संगठनले अस्पतालहरूको आर्थिक क्षमता, सेवाग्राहीको भुक्तानी क्षमता र स्वास्थ्यकर्मीको श्रम मूल्यलाई सन्तुलनमा राख्ने गरी व्यवहारिक समाधान खोज्न सुझाव दिएको छ । उनले थपे, ‘अस्पताल, स्वास्थ्यकर्मी र सरकारबीच संवाद र सहकार्य नै दीर्घकालीन समाधान हो । हामी सरकारको निर्णयप्रति आशावादी छौं र त्यसको कार्यान्वयनलाई सहयोग गर्नेछौं ।’

संगठनका सचिव हरिश्चन्द्र यादवले भने, ‘निजी क्षेत्रका अस्पतालहरू अहिले आर्थिक दवाबमा छन् । यद्यपि, यसले स्वास्थ्यकर्मीको अधिकार मर्किनु हुँदैन । उनीहरूलाई सम्मानजनक तलब दिनुपर्ने हाम्रो साझा धारणा हो ।’

यादवका अनुसार संगठनले स्वास्थ्यकर्मीको मागलाई सरकार र निजी अस्पताल सञ्चालकहरूबीचको साझा छलफलबाट समाधान गर्नुपर्ने बताएको छ । उनले आन्दोलनरत स्वास्थ्यकर्मीहरूलाई अस्पताल व्यवस्थापनसँग संवाद गरेर काममा फर्कन आग्रह गरे ।

‘सेवाको निरन्तरता नै हाम्रो पहिलो दायित्व हो । जनताका स्वास्थ्य अधिकारमा कुनै अवरोध आउनु हुँदैन,’ यादवले भने ।

संगठनले मधेश प्रदेशको सामाजिक र आर्थिक अवस्थालाई ध्यानमा राख्दै स्वास्थ्य सेवा सबै वर्गका नागरिकसम्म पुर्याउन निजी क्षेत्रले निर्वाह गरेको भूमिकाको प्रशंसा गरेको छ ।

विज्ञप्तिमा भनिएको छ, ‘सबै समूह, वर्ग र तहका जनसमुदायलाई सुलभ शुल्कमा स्वास्थ्य सेवा पुर्याउन निजी क्षेत्रका अस्पतालहरूले निरन्तर योगदान दिँदै आएका छन् । यो जिम्मेवारी पूरा गर्न स्वास्थ्यकर्मीको भूमिका अपरिहार्य छ ।’

हाल मधेश प्रदेशका विभिन्न निजी अस्पतालहरूमा कार्यरत स्वास्थ्यकर्मीहरूले पारिश्रमिक असमानता, न्यून तलब र करार सेवाको अस्थिरता विरुद्ध आन्दोलन थालेका छन् । उनीहरूले निजी र सरकारी दुवै क्षेत्रका स्वास्थ्यकर्मीबीच समान मूल्यांकनको माग गरेका छन् ।