जनकपुरधाम, २० कार्तिक । नेपाल सरकारले बालबालिकाको पोषणस्तर सुधारका लागि सञ्चालन गर्ने राष्ट्रिय भिटामिन ‘ए’ तथा जुकाको औषधी खुवाउने कार्यक्रम आजदेखि देशभर सुरु भएको छ ।

आर्थिक वर्ष २०८२/८३ अन्तर्गतको पहिलो चरणको यो अभियानको औपचारिक शुभारम्भ मधेस प्रदेशको राजधानी जनकपुरधाम–२३ बिन्धीस्थित खोप केन्द्रमा गरिएको हो ।

स्वास्थ्य कार्यालय धनुषाका प्रमुख उमेश यादवका अनुसार ६ महिनादेखि पाँच वर्षमुनिका बालबालिकालाई भिटामिन ‘ए’ क्याप्सुल र जुकाको औषधी खुवाइँदैछ । उनले भने, ‘यो कार्यक्रमले बालबालिकामा दृष्टिहीनता, रगतअभाव र पेटमा जुकाको समस्या रोकथाममा महत्वपूर्ण भूमिका खेलेको छ ।’

सरकारको लक्ष्य अनुसार देशभर करिब २७ लाख बालबालिकालाई भिटामिन ‘ए’ र २४ लाख बालबालिकालाई जुकाको औषधी खुवाइनेछ । नेपाल सरकारले सन् १९९३ (वि.सं. २०५०) देखि प्रत्येक वर्ष दुई चरणमा यो अभियान सञ्चालन गर्दै आएको छ ।

स्वास्थ्यकर्मी र महिला समुदाय स्वयंसेविकाहरूको सक्रिय सहभागितामा देशभर खोप तथा औषधी वितरण कार्य भइरहेको स्वास्थ्य मन्त्रालयले जनाएको छ ।