रौतहट, १८ कार्तिक । गत असोज १७ र १८ गतेको अविरल वर्षा र बाढीले रौतहटका किसानलाई ठूलो आर्थिक नोक्सानी पुर्याएको छ । कृषि ज्ञान केन्द्र रौतहटले सार्वजनिक गरेको तथ्यांकअनुसार जिल्लामा साढे १७ हजार हेक्टर क्षेत्रफलमा लगाइएको धानबाली पूर्ण रूपमा नष्ट भएको हो ।

बाढीका कारण बागमती, लालबकैया नदी र झाझसहित विभिन्न खोलाहरूको डुबानमा परेपछि धानबाली, उखुबाली, तरकारी, फलफूल र अन्य मौसमी बाली व्यापक क्षतिग्रस्त भएका हुन् ।

कृषि ज्ञान केन्द्रका अनुसार यसपटक १७ हजार ६ सय ३८ हेक्टर धान, १ हजार ८ सय ४ हेक्टर उखु, ६ सय ८४ हेक्टर तरकारी, ४ सय हेक्टर फलफूल र करिब ५ सय हेक्टर अन्य मौसमी बाली नष्ट भएको छ ।

सबैभन्दा बढी प्रभावित स्थानीय तहमा गढीमाई, माधवनारायण, राजदेवी, इशनाथ, राजपुर, परोहा, मौलापुर नगरपालिका साथै दुर्गा भगवती र यमुनामाई गाउँपालिका पर्दछन् । रोप्ने बेला खडेरीको सामना गरेका किसानहरूले बाला लाग्न लागेको समयमा परेको पानीले ठूलो क्षति बेहोर्नु परेको कृषि विशेषज्ञहरूले बताएका छन् ।

कृषि ज्ञान केन्द्र रौतहटका निमित्त प्रमुख सुरेन्द्रप्रसाद कुर्मीले अनुमान लगाए अनुसार यस बाढीले ७४ हजार मेट्रिक टन धानको उत्पादनमा गिरावट ल्याउने छ । उनले भने, ‘घर भित्र्याउने बेलामा परेको बेमौसमी बाढीले किसानको मेहनत र लगानी पूर्ण रूपमा नष्ट गरेको छ । यसले उनीहरूको वर्षभरीको आहार र आर्थिक स्थिति प्रभावित बनाएको छ ।’

गत वर्ष पनि बाढीले ठूलो क्षति पुर्याएको भए तापनि किसानहरूले राज्यबाट उचित मुआब्जा नपाएको अनुभव गरेका थिए । यसपटक पनि राहत र अनुदान पाउने आशा न्यून भएको किसानहरूले बताएका छन् ।

कृषि विज्ञहरूले आगामी दिनमा यस्ता बेमौसमी वर्षा र बाढीको जोखिमलाई मध्यनजर गर्दै सिँचाइ प्रणाली सुधार, बाढी व्यवस्थापन र आपतकालीन राहत योजना निर्माण गर्न आवश्यक रहेको बताएका छन् । स्थानीय तहले प्रभावित किसानहरूको क्षतिपूर्ति र राहत वितरणको तयारी थालेको जनाइएको छ ।

रौतहटका कृषि अधिकारीहरू यस अवस्थालाई गम्भीर मान्दै प्रभावित क्षेत्रहरूमा छिटो राहत, बीउ–बाली उपलब्धता र कृषि विशेषज्ञ टोली परिचालन गर्न पहल गरिरहेका छन् ।