जनकपुरधाम, १८ कार्तिक । मधेश प्रदेशमा झाडापखालाका बिरामीहरू देखिन थालेसँगै प्रदेश सरकार सक्रिय बनेको छ । प्रदेशका मुख्यमन्त्री जितेन्द्र प्रसाद सोनलले स्वास्थ्य मन्त्रालय र सम्बन्धित निकायहरूलाई तत्काल रोग नियन्त्रणका लागि ठोस कदम चाल्न निर्देशन दिएका छन् ।

सप्तरी जिल्लाका विभिन्न स्थानमा झाडापखालाका बिरामी बढ्दै गएपछि मुख्यमन्त्री सोनलले स्वास्थ्य तथा जनसंख्या मन्त्रालयका सचिव, सप्तरीका प्रमुख जिल्ला अधिकारी, छिन्नमस्ता गाउँपालिकाका अध्यक्ष बिद्यानन्द चौधरी, स्वास्थ्य कार्यालय सप्तरीका प्रमुखलगायतसँग प्रत्यक्ष छलफल र टेलिफोन वार्ता गरी आवश्यक कार्ययोजना तत्काल लागू गर्न निर्देशन दिएका हुन् ।

मुख्यमन्त्री सोनलले संक्रमितहरूको उपचारमा कुनै कमी हुन नदिन औषधि, स्वच्छ पानी, स्वास्थ्यकर्मी र आवश्यक उपकरण तुरुन्त उपलब्ध गराउन निर्देशन दिएका छन् । उनले स्वास्थ्य सेवा सबैसम्म पुग्ने सुनिश्चितता गर्न र रोगको थप संक्रमण रोक्न जनचेतनामूलक अभियान सशक्त रूपमा सञ्चालन गर्न पनि जोड दिएका छन् ।

उनले भने, ‘जनताको स्वास्थ्य राज्यको पहिलो दायित्व हो । झाडापखालाको जोखिम नियन्त्रणमा सबै तह र निकायले तत्काल समन्वयका साथ काम गर्नुपर्छ ।’

त्यस्तै, मुख्यमन्त्री सोनलले प्रदेश स्वास्थ्य निर्देशनालय र स्वास्थ्य आपूर्ति व्यवस्थापन केन्द्रका निर्देशकहरूलाई आवश्यक स्रोत–साधन परिचालन गर्न निर्देशन दिएका छन् । उनले महामारी फैलिन नदिन स्वास्थ्य विज्ञ टोली र जनशक्ति तयारी अवस्थामा राख्न आदेश दिएका छन् ।

प्रदेश सरकारले झाडापखालाको सम्भावित जोखिमलाई मध्यनजर गर्दै आपत्कालीन स्वास्थ्य टोली परिचालनको तयारी गरिरहेको जनाएको छ । आवश्यक परेमा उच्चस्तरीय चिकित्सक टोली र राहत सामग्री प्रभावित क्षेत्रमा पठाइने पनि जनाइएको छ ।

यसैबीच, सप्तरीको छिन्नमस्ता गाउँपालिकाका स्थानीय स्वास्थ्यकर्मीहरूले गाउँमा दैनिक रूपमा बिरामी संख्या बढ्दै गएको जानकारी दिएका छन् । उनीहरूले दूषित खानेपानी र सरसफाइको कमीले संक्रमण फैलिन सक्ने चेतावनी दिएका छन् ।

प्रदेश स्वास्थ्य मन्त्रालयले झाडापखाला रोकथामका लागि सफा खानेपानी प्रयोग, हात धुने बानी, उमालेको पानी पिउने र खाना राम्रोसँग पकाएर खाने सन्देश सार्वजनिक गरेको छ ।

सरकारले जनस्वास्थ्य सुरक्षा सुनिश्चित गर्न स्थानीय तहसँग सहकार्य गर्दै सतर्कता र उपचारका सबै तयारी पूरा गरिरहेको जनाएको छ ।