जनकपुरधाम, १८ कार्तिक । मधेश प्रदेशका पूर्वमुख्यमन्त्री सतिश कुमार सिंह र शिक्षामन्त्री महावीर पुनबीच प्रदेशको समग्र शैक्षिक अवस्थाबारे विस्तृत छलफल भएको छ ।

शिक्षा मन्त्रालयमा भएको भेटघाटमा विद्यालयदेखि उच्च शिक्षासम्मको गुणस्तरीय सुधारका विषयमा दुई नेताबीच गम्भीर कुराकानी भएको हो ।

छलफलका क्रममा मधेश प्रदेशमा देखिएका शिक्षक अभाव, सिकाइ स्तरमा गिरावट, विद्यालयको भौतिक पूर्वाधार अभाव र व्यवहारिक शिक्षाको कमी लगायतका समस्याबारे गहन चर्चा गरिएको थियो । दुवै नेताले प्रदेशको शैक्षिक सुधारलाई दिगो र प्रभावकारी बनाउन दीर्घकालीन रणनीति आवश्यक रहेकोमा जोड दिएका छन् ।

पूर्वमुख्यमन्त्री सिंहले मधेशमा शिक्षा क्षेत्रलाई सबल बनाउन सरकारको योजनामा प्राथमिकता आवश्यक रहेको बताउँदै विद्यालय स्तरमै सुधार र लगानीको दिशा परिवर्तन गर्न सुझाव दिएका थिए । उनले भने, ‘विद्यालयमा सिकाइको गुणस्तर कमजोर हुँदा विद्यार्थीको भविष्य अनिश्चित बन्दै गएको छ । यो अवस्थालाई सुधार्न ठोस नीति र कार्यान्वयन चाहिन्छ ।’

त्यसैगरी, शिक्षामन्त्री पुनले शिक्षालाई प्रदेशको दिगो विकासको मेरुदण्डका रूपमा लिँदै सबै पक्षको साझा प्रयास आवश्यक रहेको उल्लेख गरे । उनले गुणस्तरीय, समावेशी र प्रविधिमुखी शिक्षाको विकासलाई मन्त्रालयले मुख्य एजेन्डा बनाएको बताए ।

भेटमा दुबै नेताबीच विद्यालयहरूको पूर्वाधार सुदृढीकरण, शिक्षक अभाव समाधान, प्रविधि र सीपमूलक शिक्षा विस्तार, तथा सिकाइ उपलब्धि मापन प्रणाली सुदृढ गर्ने विषयमा पनि सहमति बनेको बताइएको छ ।

शिक्षामन्त्री पुनले मन्त्रालयले चाँडै मधेश शिक्षा सुधार कार्ययोजना तयार गर्दै कार्यान्वयनमा लैजाने तयारी भइरहेको जानकारी दिएका छन् । उनले प्रदेशका सबै स्थानीय तहहरूसँग सहकार्यमा गुणस्तरीय शिक्षा सुनिश्चित गर्न पहल अघि बढाइएको बताए ।