जनकपुरधाम, १७ कार्तिक । नेकपा (माओवादी केन्द्र) मधेश प्रदेश संसदीय दलको नेतामा भरतप्रसाद साह पुनः नियुक्त भएका छन् ।

मधेश प्रदेशका पूर्वमन्त्री समेत रहेका साहलाई पार्टी अध्यक्ष पुष्पकमल दाहाल ‘प्रचण्ड’ले मधेश प्रदेशसभामा दलको नेता पुनः नियुक्त गरेको जानकारी दिइएको छ ।

माओवादी केन्द्रका संयोजक दाहालद्वारा हस्ताक्षरित पत्र प्रदेशसभाका सभामुख रामचन्द्र मण्डललाई पठाइएको थियो । पत्रमा उल्लेख छ, ‘नेपाल कम्युनिस्ट पार्टी (माओवादी केन्द्र) मधेश प्रदेश संसदीय दलको नेतामा भरतप्रसाद साहलाई पुनःस्थापित गर्ने निर्णय भएकाले उनलाई दल नेता कायम गरी दलको तर्फबाट प्रतिनिधित्व गराउन अनुरोध गर्दछु ।’

साह यसअघि पनि माओवादी केन्द्रको तर्फबाट संसदीय दलको नेता रहिसकेका थिए ।