सप्तरी, १७ कार्तिक । सप्तरीको छिन्नमस्ता गाउँपालिका–५ लोखरममा झाडापखालाबाट प्रभावित क्षेत्रमा आरडिटी परीक्षणमा तीन जनामा हैजा पोजेटिभ देखिएको छ ।

स्वास्थ्य कार्यालय सप्तरी र गाउँपालिकाका स्वास्थ्यकर्मीले नौ जनाको पखालाको आरडिटी परीक्षण गरेका थिए ।

स्वास्थ्य संयोजक दिपेन्द्र यादवले आरडिटी रिपोर्ट पूर्ण विश्वसनीय नभएको बताउँदै थप जाँचका लागि नमुना माथिल्लो निकायमा पठाइएको जानकारी दिए ।

उनले भने, ‘आरडिटीले शतप्रतिशत हो भन्ने कुरा प्रमाणित गर्न सकिँदैन । तर, पूर्ण रिपोर्ट नआएसम्म हो नै मानेर काम गर्नुपर्ने हुन्छ ।’

जाँचपछि आइतबार गाउँपालिकाको विपद् व्यवस्थापन समितिको बैठकले प्रभावित क्षेत्रलाई तत्काल आइसोलेट गर्ने निर्णय गरेको छ ।

बैठकले त्यहाँ स्वास्थ्यकर्मी खटाउने, जनचेतना फैलाउने र सबैलाई सावधानी अपनाउन निर्देशन दिने निर्णय पनि गरेको गाउँपालिकाका अध्यक्ष विद्यानन्द चौधरीले जानकारी दिए ।

लोखरमको मुसहर बस्तीमा झाडापखालाका कारण एकै परिवारका तीन जनाको मृत्यु भइसकेको छ । यस घटनापछि स्थानीय बासिन्दा त्रसित बनेका छन् भने स्वास्थ्यकर्मीहरूले सचेतना अभियान तेज पार्ने तयारी गरिरहेका छन् ।

स्वास्थ्य अधिकारीहरूले प्रभावित क्षेत्रमा सरसफाइ, खानेपानीको निगरानी र सुरक्षाका उपाय अपनाउन स्थानीयलाई सचेत गराउने बताएका छन् ।