जनकपुरधाम, १७ कार्तिक । लोकतान्त्रिक समाजवादी पार्टी (लोसपा) नेपालका अध्यक्ष महन्थ ठाकुरले आगामी चुनावका लागि देशभर अझै पनि उचित वातावरण बन्न नसकेको बताएका छन् ।

उनले राजनीतिक स्थिरता र विश्वासको माहोल बिना निष्पक्ष र स्वतन्त्र निर्वाचन सम्भव नहुने बताउँदै अनुकूल परिस्थिति बनेपछि मात्र पार्टी चुनावमा जाने स्पष्ट पारेका छन् ।

जनकपुरधाममा सोमबार सञ्चारकर्मीहरूसँग संक्षिप्त कुराकानी गर्दै अध्यक्ष ठाकुरले पार्टी अधिवेशन नजिकिँदै गरेको र त्यस अधिवेशनले आगामी राजनीतिक रणनीति तथा निर्वाचनसम्बन्धी अन्तिम निर्णय गर्ने जानकारी दिए । उनले अहिले लोसपा पार्टी संगठन सुदृढीकरण र अधिवेशन तयारीमा केन्द्रित रहेको बताए ।

अध्यक्ष ठाकुरले देशको हालको राजनीतिक परिस्थितिबारे चिन्ता व्यक्त गर्दै भने, ‘आज नेताहरू घरबाहिर निस्कने अवस्था छैन, जनता असुरक्षित महसुस गरिरहेका छन् । यस्तो अवस्थामा चुनाव हुन्छ भन्नेमा नै व्यापक शंका छ ।’

उनका अनुसार राजनीतिक निकासका लागि संसद् पुनःस्थापना नै अहिलेको उत्तम विकल्प हो । उनले भने, ‘संविधानको मर्म र जनताको म्यान्डेट अनुसार संसद् पुनःस्थापना गरे मात्र राजनीतिक स्थायित्वको बाटो खुल्छ ।’

लोसपा अध्यक्ष ठाकुरले लोकतान्त्रिक अभ्यासलाई मजबुत बनाउने र जनता केन्द्रित राजनीतिक प्रणालीमा फर्कन सबै दलले सहमति खोज्नुपर्ने पनि बताए । उनले पार्टीको नीति जनताको विश्वास जित्ने दिशामा रहेको उल्लेख गर्दै भने, ‘हाम्रो राजनीति सत्ता नभई स्थायित्व र सहअस्तित्वतर्फ केन्द्रित छ ।’