जनकपुरधाम, १६ कार्तिक । मधेश प्रदेशका मुख्यमन्त्री जितेन्द्र प्रसाद सोनलले प्रदेश सभाबाट विश्वासको मत प्राप्त गरेपछि मात्रै मन्त्रिपरिषद् विस्तार गर्ने तयारी गरेका छन् ।

विश्वासको मत लिनुअघि मन्त्रिपरिषद् विस्तार गर्दा जनमत पार्टीभित्र विभाजनको प्रभाव बढ्ने आकलन गर्दै अहिलेका लागि तीन सदस्यीय सरकारबाटै काम अघि बढाइने भएको हो ।

सत्ता साझेदार दलहरूबीच मन्त्रालयको भागबण्डाबारे सैद्धान्तिक सहमति भइसके पनि दलहरूले आफ्ना मन्त्रीको नाम अन्तिम टुंगोमा नपुर्याएका कारण विस्तार स्थगित गरिएको मुख्यमन्त्री कार्यालय स्रोतले जनाएको छ ।

मुख्यमन्त्री सोनलले पद तथा गोपनीयताको शपथ ग्रहण गरेसँगै दुई जना मन्त्रीलाई शपथ दिलाएका थिए । तर, उनीहरूलाई अहिलेसम्म जिम्मेवारी तोकिएको छैन । हाल सबै मन्त्रालयको जिम्मेवारी मुख्यमन्त्री सोनलकै काँधमा छ ।

सत्ता गठबन्धनमा सात दल सहभागी रहेका छन् । जसपाका १९, जनमत पार्टीका १३, माओवादी केन्द्रका ९, लोकतान्त्रिक समाजवादी पार्टी (लोसपा) का ८, नेकपा एकीकृत समाजवादीका ७, नागरिक उन्मुक्ति पार्टी र नेपाल संघीय समाजवादी पार्टीका एक–एक जना सांसद छन् ।

स्रोतका अनुसार जसपा नेपालले चार वटा मन्त्रालय पाउनेछ । जनमत पार्टीले तीन, माओवादी केन्द्रले दुई र लोसपा तथा समाजवादी पार्टीले एक–एक मन्त्रालय पाउने सहमति भएको छ । जसपा नेपालले आफ्ना मन्त्रीहरूको नाम लगभग टुंगोमा पुर्याएको छ ।

रामअशिष यादवलाई भौतिक पूर्वाधार विकास मन्त्रालय, मनिष सुमनलाई शिक्षा तथा संस्कृति मन्त्रालय र राजु गुप्तालाई स्वास्थ्य मन्त्रालयको जिम्मेवारी दिने तयारी भएको बताइन्छ । चौथो मन्त्रालयमा रौतहट वा बाराबाट एक जनालाई प्रतिनिधित्व गराउने सम्भावना रहेको जसपा स्रोतको भनाइ छ ।

माओवादी केन्द्रले नयाँ अनुहारलाई सरकारमा पठाउने तयारी गरेको छ भने जनमत पार्टीले बाँकी दुई मन्त्रालयमा पुरानै अनुहार दोहोर्याउने सम्भावना रहेको बताइन्छ । लोसपा नेपालले रानी शर्मालाई पुनः मन्त्री बनाउने तयारी गरेको छ ।

मुख्यमन्त्री सोनलले विश्वासको मत कार्तिक २२ गते (शनिबार) लिन लागेका छन् । गठबन्धनका नेताहरूका अनुसार विश्वासको मत प्राप्त गरेलगत्तै २३ गते आइतबार मन्त्रिपरिषद् विस्तार गरिनेछ ।

गठबन्धनका सात दलका जम्मा ५८ जना प्रदेशसभा सदस्य रहेकोले मुख्यमन्त्री सोनललाई विश्वासको मत लिन कठिनाइ नहुने देखिन्छ । जनमत पार्टीका निवर्तमान मुख्यमन्त्री सतिश कुमार सिंह र सांसद त्रिभुवन साह जनस्वराज पार्टीमा प्रवेश गरे पनि त्यसले सरकारको स्थायित्वमा ठूलो असर नपर्ने विश्लेषण गरिएको छ ।

विपक्षी दलका तर्फबाट नेकपा एमालेका २३, नेपाली कांग्रेसका २२ र राष्ट्रिय प्रजातन्त्र पार्टीका एक जना सांसद छन् । शक्ति सन्तुलनका हिसाबले सोनल नेतृत्वको सरकार सुरक्षित देखिएको छ ।

यसैबीच, लोसपा नेपालका केन्द्रीय महासचिव परमेश्वर साहले मधेशमा स्थिर र विकासोन्मुख सरकार बनाउन सबै दलको सहयोग आवश्यक रहेको बताएका छन् ।

उनले भने, ‘जेनजी आन्दोलनपछि मधेशमा चुनौती थपिएका छन् । ती चुनौती सामना गर्न सबै राजनीतिक शक्तिको साझा प्रयत्न जरुरी छ । विश्वासको मतपछि पूर्ण मन्त्रिपरिषद् गठन गरी सरकारलाई तीव्र गतिमा अघि बढाइनेछ ।’