जनकपुरधाम, १६ कार्तिक । मधेशका निजी अस्पतालका स्वास्थ्यकर्मीहरू श्रमशोषणको विरोध र अधिकार सुनिश्चितताका लागि आन्दोलनमा उत्रिएका छन् ।

उनीहरूले न्यून तलब, असमान व्यवहार र असुरक्षित कार्य वातावरणविरुद्ध आठ बुँदे मागसहित आन्दोलन सुरु गरेका हुन् ।

स्वास्थ्यकर्मीहरूको मागमा नेपाल सरकारको नियमअनुसार तलब स्केल लागू गर्नुपर्ने, सरकारी स्वास्थ्य संस्थामा कार्यरत करारकर्मीलाई हटाई लोक सेवा आयोगमार्फत विज्ञापन गर्नुपर्ने, स्वास्थ्यकर्मीको बीमा तथा सुरक्षाको व्यवस्था गर्नुपर्ने र हप्तामा अधिकतम ४२ घण्टामात्र कार्यसमय तोक्नुपर्ने लगायतका बुँदाहरू छन् ।

स्वास्थ्यकर्मी नवेश अधिकारीका अनुसार मन्त्रालयले पटक–पटक निर्देशन जारी गरे पनि निजी अस्पतालहरूले त्यसको कार्यान्वयन नगरेका कारण आफूहरू आन्दोलनमा जान बाध्य भएका हुन् ।

‘हामी वर्षौँदेखि न्यून तलबमा असमान व्यवहारका बीच काम गर्दै आएका छौं । बारम्बारको आग्रहपछि पनि अवस्था नबदलिएकाले अब आन्दोलन नै अन्तिम विकल्प बनेको छ,’ अधिकारीले भने ।

स्वास्थ्यकर्मीहरूले श्रम मन्त्रालय, मुख्यमन्त्री तथा मन्त्रीपरिषद् कार्यालय, स्वास्थ्य मन्त्रालय र जिल्ला प्रशासन कार्यालयको ध्यानाकर्षण गराए पनि हालसम्म कुनै ठोस पहल नभएको गुनासो गरेका छन् ।

आन्दोलनका कारण प्रदेशका विभिन्न निजी अस्पतालमा सेवा प्रभावित बनेको छ । आपतकालीनबाहेकका सेवा ठप्प हुँदा बिरामीहरू समस्यामा परेका छन् ।