जनकपुरधाम, १५ कार्तिक । मिथिलाको समृद्ध लोकसंस्कृतिको महत्वपूर्ण पर्व सामा–चकेवालाई जीवन्त राख्न र नयाँ पुस्तामा परम्परागत मूर्तिकलाको सीप हस्तान्तरण गर्ने उद्देश्यले जनकपुरधाममा ‘सामा–चकेवा मूर्तिकला निर्माण कार्यशाला’को आयोजना गरिएको छ ।

नेपाल ललितकला प्रज्ञा प्रतिष्ठान र मैथिली विकास कोष जनकपुरधामको संयुक्त आयोजनामा जारी पाँचदिने कार्यशालामा २० जना महिलाहरू सहभागी छन् ।

सामा–चकेवाका मूर्ति निर्माणका विज्ञ विजय मण्डल र चित्रकार रुबी पाठकले सहभागी महिलाहरुलाई माटाका मूर्तिहरू बनाउने सीप र कलात्मक अभ्यासमा प्रशिक्षण दिइरहेका छन् ।

मैथिली विकास कोषका सदस्य सचिव श्याम सुन्दर शशीले मिथिलाको सांस्कृतिक पहिचानलाई सजीव राख्न यस कार्यशालाले महत्वपूर्ण भूमिका खेल्ने बताउनुभयो । उहाँले सामा–चकेवा पर्व मात्र नभई यो मिथिलाको सामाजिक एकता, भावनात्मक सम्बन्ध र कलात्मक अभिव्यक्तिको रहेको बताए ।

त्यसैगरी चित्रकार रुबी पाठकले परम्परागत मूर्तिकला मिथिलाको सौन्दर्य र मौलिकताको जड भएको बताउँदै युवाहरूमा यसप्रति चासो बढाउनुपर्नेमा जोड दिइन् । उनले सामा–चकेवाका माटाका मूर्तिहरूमा कला मात्र नभई यसमा कथा, संस्कार र भावना मिसिएको बताइन् । उनले नयाँ पुस्ताले यसलाई आत्मसात् गरेमा सांस्कृतिक सम्पदा संरक्षणमा ठूलो योगदान पुग्ने बताइन् ।

कार्यशालामा सामा–चकेवा पर्वको सांस्कृतिक महत्व, कलात्मक पक्ष र आधुनिक पुस्तालाई परम्परागत संस्कृतिसँग कसरी जोड्ने भन्ने विषयमा पनि छलफल भइरहेको आयोजकले जनाएको छ ।

यसैबीच मैथिली विकास कोषको आयोजनामा आइतबार जनकपुरधामको जानकी मन्दिर प्राङ्गणमा सामा–चकेवा महोत्सव–२०८२ आयोजना हुने भएको छ । प्रतियोगितात्मक रूपमा आयोजना गरिने उक्त महोत्सवले मिथिलाको मौलिक खेल, गीत र नृत्यको संरक्षणमा थप योगदान पुर्याउने विश्वास आयोजकले व्यक्त गरेको छ ।