जनकपुरधाम, १२ कार्तिक । नेपाल ललितकला प्रज्ञा प्रतिष्ठान र मैथिली विकास कोष जनकपुरधामको संयुक्त आयोजनामा जनकपुरधाममा पाँच दिने ‘सामा–चकेवा मूर्तिकला निर्माण कार्यशाला’ बिहीबारदेखि सुरू हुन लागेको छ ।

मैथिली समुदायको मौलिक सांस्कृतिक सम्पदा सामा–चकेवा पर्वसँग सम्बन्धित मूर्तिकलाको संरक्षण, प्रवर्द्धन र नयाँ पुस्तामा हस्तान्तरण गर्नु कार्यक्रमको मुख्य उद्देश्य रहेको मैथिली विकास कोषका अध्यक्ष जीवनाथ चौधरीले बताए ।

अध्यक्ष चौधरीले भने, ‘सामा–चकेवा केवल पर्व मात्र नभई यो हाम्रो सांस्कृतिक पहिचानको प्रतीक हो । परम्परागत मूर्तिकला सिकेर युवाले संस्कृति जोगाउने र आत्मनिर्भर बन्ने बाटो समात्न सक्नेछन् ।’

उनले नेपाल ललितकला प्रज्ञा प्रतिष्ठानको सहकार्यले मैथिली कला, संस्कृति र परम्परालाई राष्ट्रिय स्तरमा चिनाउने अवसर मिलेको बताए ।चौधरीका अनुसार कार्यशालामा स्थानीय कलाकार र विद्यार्थीहरूलाई सामा–चकेवा सम्बन्धी मूर्तिकलाको व्यवहारिक प्रशिक्षण दिइनेछ ।

कार्यशाला कार्तिक १७ गते सोमबारसम्म सञ्चालन हुने र अन्तिम दिन सहभागी कलाकारका सिर्जनाहरू प्रदर्शनीमा राखिने कार्यक्रम रहेको कोषले जनाएको छ ।