जनकपुरधाम, ६ कार्तिक । जनता समाजवादी पार्टी (जसपा) नेपालका केन्द्रीय सचिव शैलेन्द्रप्रसाद साहले पार्टी छठ पर्वपछि मधेश प्रदेश सरकारमा सहभागी हुने तयारीमा रहेको बताएका छन् । उनले जसपा नेतृत्वले गठबन्धन दलहरूसँग समन्वय गरी सरकारमा प्रवेश गर्ने अन्तिम तयारी गरिरहेको जानकारी दिए ।

सचिव साहका अनुसार मुख्यमन्त्री जितेन्द्र सोनलको नेतृत्वमा गठन भएको नयाँ सरकारले प्रदेशसभाबाट विश्वासको मत लिँदैछ । त्यसपछि गठबन्धनका दलहरूले साझा नीतिगत कार्यसूची तय गरेर सरकार सञ्चालनमा जुट्नेछन् ।

‘छठ पर्व सकिएलगत्तै जसपा नेपाल सरकारमा सहभागी हुनेछ,’ साहले भने, ‘गठबन्धनको साझा एजेन्डाअनुसार मन्त्रीहरू चयन गरिनेछ ।’

जसपा नेपालका प्रदेशसभा सदस्यहरू सक्षम, अनुभवी र जनउत्तरदायी रहेको दाबी गर्दै सचिव साहले भने, ‘हामी जनताको विश्वास जित्न चाहन्छौं । त्यसका लागि काम गर्नसक्ने, इमानदार र योग्य जनप्रतिनिधिलाई मात्र सरकारमा पठाउने निर्णय गरिएको छ ।’

उनका अनुसार यो निर्णय राष्ट्रिय अध्यक्ष उपेन्द्र यादवको परामर्शअनुसार संसदीय दलको बैठकले गरेको हो । जसपाले अब परिणाममुखी शासन र जनताप्रति उत्तरदायी नीति अपनाउने प्रतिबद्धता जनाएको उनले स्पष्ट पारे ।

सचिव साहले जसपाको मुख्य उद्देश्य मधेश प्रदेशलाई सुशासन, विकास र स्थायीतर्फ अघि बढाउने रहेको बताए । उनले भने, ‘जनताको भरोसा पुनःस्थापित गर्नका लागि सरकारमा हाम्रो सहभागिता नीतिगत र परिणाममुखी हुनेछ ।’

उनका अनुसार मन्त्री चयनदेखि नीति निर्माणसम्मका सबै निर्णयहरू जनताको मनोभावना र प्रदेशको प्राथमिकताअनुसार हुनेछन् ।

जसपा नेतृत्वले छठ पर्वपछि औपचारिक रूपमा मन्त्रीहरूको नाम टुंगो लगाउँदै सरकारमा प्रवेश गर्ने तयारी गरेको छ । अहिले पार्टीभित्र मन्त्रालय विभाजन र प्रतिनिधित्वको सन्तुलनबारे छलफल जारी छ ।

गठबन्धन दलहरूले पनि जसपाको सरकारमा सहभागितालाई सकारात्मक रूपमा स्वागत गर्ने मनोवृत्ति देखाएका छन् ।