रौतहट, ६ कार्तिक । रौतहट जिल्लाको फतुवा विजयपुर नगरपालिका–६ पेटभरवामा बुधबार साँझ परम्परागत ‘सोहरैया’ पर्व अत्यन्तै भव्यताका साथ सम्पन्न भएको छ ।

पशुपालन पेशासँग गहिरो सम्बन्ध राख्ने यो प्राचीन पर्वमा यस वर्ष सयौँ किसान र पशुपालकहरूले उत्साहपूर्वक सहभागिता जनाएका थिए । गाउँभर ‘हियालोलो, हियालोलो’ भन्ने सामूहिक आवाज गुञ्जिँदा वातावरण नै उत्सवमय बनेको थियो ।

परापूर्वकालदेखि मनाइँदै आएको सोहरैया पर्वलाई मिथिला र तराई क्षेत्रका पशुपालक समुदायले आफ्नो प्रमुख चाडका रूपमा मान्ने गर्छन् । लक्ष्मी पूजाको भोलिपल्ट मनाइने यो पर्वमा बिहानैदेखि किसान र पशुपालकहरूले आफ्ना गाई, भैँसी, गोरु र पाडालाई नुहाइधुवाई गरी नयाँ डोरी र नथ लगाइ सजाउँछन् । त्यसपछि दिउँसो गाउँका चौपायाहरूलाई सामूहिक रूपमा चौरमा जम्मा गरी पर्वको मुख्य विधि सुरु गरिन्छ ।

परम्परा अनुसार चौरमा जम्मा गरिएका गाई–भैँसीहरूको बीचमा डोरीले बाँधिएको सुँगुरको बच्चा घिसारिन्छ । सुँगुरको आवाजले चौपायाहरू तर्सिँदै दौडिन थाल्छन् । त्यसलाई ‘डाढ बोलाउने’ भनिन्छ । यही क्षणमा उपस्थित किसान र पशुपालकहरू ‘हियालोलो’ भन्दै खुसी मनाउँछन् । यो दृश्य हेर्नका लागि गाउँका बालबालिका, युवा र वृद्ध सबैजना उत्साहित देखिन्थे ।

यस वर्षको सोहरैया पर्वमा पेटभरवा, टेंग्राहा, फतुवा लगायतका गाउँबाट करिब दुई सयभन्दा बढी गाई–भैँसी सहभागी गराइएका थिए । चौरमा हजारौँ दर्शकहरूको उपस्थिति थियो । कार्यक्रममा स्थानीय युवाहरूले परम्परागत गीत र नाच प्रस्तुत गरेका थिए भने गाउँका बालकहरूले हियालोलो चिच्याउँदै पर्वको उल्लास बढाएका थिए ।

सो अवसरमा स्थानीय युवाहरूबीच मैत्रीपूर्ण कुस्ती प्रतियोगिता समेत आयोजना गरिएको थियो । विजेताहरूलाई स्थानीय समाजसेवी र जनप्रतिनिधिहरूले पुरस्कृत गरे । परम्परागत विश्वास अनुसार सोहरैया पर्वमा सहभागी गराइएका गाई–भैँसीहरूको रोग प्रतिरोधात्मक शक्ति बढ्ने र उत्पादन क्षमता राम्रो हुने विश्वास छ ।

स्थानीय बासिन्दाहरूका अनुसार सोहरैया केवल पशुपालकहरूको चाड नभई यो सामूहिक एकता, सहकार्य र संस्कृतिको प्रतीक पनि हो । वृद्ध किसान रामप्रसाद यादव भन्छन्, ‘हियालोलोको आवाजमा हाम्रो परम्परा र जीविकाको कथा मिसिएको छ । यस्तो पर्वले गाउँबीचको आपसी सम्बन्धलाई अझ बलियो बनाउँछ ।’