महोत्तरी, ५ कार्तिक । नेकपा माओवादी केन्द्रका संयोजक पुष्पकमल दाहाल ‘प्रचण्ड’ले देश अहिले अत्यन्तै जटिल र ठूलो संकटको स्थितिमा पुगेको बताएका छन् ।

बुधबार महोत्तरीमा आयोजित कार्यक्रममा उनले ठुलो विध्वंस र अस्थिर राजनीतिक परिस्थितिलाई अहिलेसम्मको इतिहासमै पहिले नदेखिएको भन्दै चिन्ता व्यक्त गरे ।

प्रचण्डले देशभित्र रहेका सबै वामपन्थी र कम्युनिस्ट दलबीच एकता आवश्यक रहेकोमा जोड दिँदै भने, ‘संघीय लोकतान्त्रिक गणतन्त्र, समावेशिता, पहिचान र अधिकारको पक्षमा एकजुट भएका सबै राजनीतिक दल, नागरिक समाज र आम जनता एक हुनुको विकल्प छैन ।’

उनले वर्तमान अन्तरिम सरकारलाई जटिल परिस्थितिमा बनेको उल्लेख गर्दै भने, ‘यो अन्तरिम सरकारले फागुन २१ गते निर्वाचन घोषणा गरेको छ । हामीले सम्पूर्ण राष्ट्र एकजुट भएर घोषित मितिमा नै निर्वाचन सम्पन्न गर्ने, नयाँ प्रतिनिधिसभा र जेनजी युवाहरूको माग सम्बोधन गर्ने गरी संविधान संशोधन गर्नुपर्छ । यसका लागि कुनै हिचकिचाहट वा दुविधा नराख्नु आवश्यक छ ।’

प्रचण्डले गत २३ गते जेनजी युवाहरूले गरेको आन्दोलनको स्मरण गर्दै तत्कालीन सरकारले त्यसलाई दबाउन गरेको दमन र हत्यालाई नेपालकै इतिहासमा कहिल्यै नबिर्सिने परिघटना भने । उनले भने, ‘आन्दोलन हुनुअघि नै हामी हुलाकीमार्ग केन्द्रित अभियानमा थियौं । युवाहरूको असन्तुष्टि, विशेषगरी सामाजिक सञ्जालमा प्रतिबन्ध लगाउँदा उनीहरू आन्दोलनमा आउँछन् भन्ने थाहा थियो । त्यसैले मैले गोरखाबाटै स्ट्याटस लेख्दै ‘युवाहरूका माग जायज छन्’ भनेको थिएँ ।’

कार्यक्रममा प्रचण्डले सरकारलाई चेतावनी दिँदै दमनको बाटो नअपनाउन आग्रह गरेको पनि बताए । यद्यपि, सरकार दमनमा उत्रिएको र दर्जनौं युवाहरूको हत्या तथा घाइते हुने घटनापछि आफूहरूले तत्काल अभियान रोकेर काठमाडौं आएर जेनजी युवाहरूको माग समर्थन गरेका थिए ।

माओवादी केन्द्रले मृतकहरूलाई शहीद घोषणा गर्ने, श्रद्धाञ्जली व्यक्त गर्ने र तत्काल केपी ओलीले राजीनामा दिनुपर्ने पहिलो वक्तव्य दिएको प्रचण्डले बताए । उनले २४ गतेको विध्वंसपछि देशमा ‘राज्यविहीनता’ जस्तो अवस्था देखा परेको र त्यसलाई रोक्न सहजीकरणको भूमिका खेलेको दाबी पनि गरे ।

प्रचण्डले २६ गते राति राष्ट्रपति भवनमा राति ९ बजेदेखि साढे ३ बजेसम्म राजनीतिक सहजीकरण र संविधान तथा समावेशी अधिकारको रक्षा सम्बन्धमा सक्रिय भूमिका खेलेको उल्लेख गरे । यसैबीच, अन्तरिम सरकार गठन गर्ने र त्यसलाई वैधानिकता दिन माओवादी केन्द्रको भूमिका महत्त्वपूर्ण रहेको उनले जोड दिए ।

कार्यक्रममा प्रचण्डले केपी ओलीको अहंकार प्रदर्शन भए पनि सोही ओलीको सिफारिसमा बनेको सुशील कार्की नेतृत्वको सरकार वैधानिक रहेको कुरा नेपाली जनतासामु राख्नु पर्ने चुनौती रहेको पनि बताए ।