जनकपुरधाम, ४ कार्तिक । मिथिलाको आस्था र संस्कृतिको प्रतीक जानकी मन्दिर दीपावलीको रात पटाका र आतिशबाजीले गुञ्जिएपछि स्थानीय आक्रोशित बनेका छन् ।

धार्मिक आस्थाको केन्द्र मानिने यो मन्दिर परिसरभित्र सयौँ युवाहरूले पटका पड्काउँदै र आतिशबाजी गर्दै रमिता मच्चाएको दृश्यले श्रद्धालु, धार्मिक अगुवा र बुद्धिजीवी समुदायलाई स्तब्ध पारेको छ ।

स्थानीयका अनुसार दीपावलीको अवसरमा मन्दिर परिसर धुँवा, आवाज र भीडले भरिएको थियो । जहाँ श्रद्धा, शान्ति र भक्ति झल्किनु पर्ने थियो त्यहाँ रमिता, सेल्फी र ध्वनि प्रदूषणले धार्मिक वातावरणलाई नै प्रभावित बनाएको उनीहरूको गुनासो छ ।

धार्मिक अगुवाहरूले यस कार्यलाई पवित्र स्थलप्रतिको असम्मान भन्दै आलोचना गरेका छन् । पछिल्ला वर्षहरूमा जानकी मन्दिर परिसरमा विभिन्न सांस्कृतिक कार्यक्रम, खेल प्रदर्शन र आतिशबाजीका नाममा होहल्ला र भीड बढ्दै गएको स्थानीयहरू बताउँछन् । उनीहरूको भनाइमा आस्थाको भूमिलाई मनोरञ्जनको थलोमा रूपान्तरण गर्ने प्रवृत्तिले मन्दिरको पवित्रता र सांस्कृतिक गरिमा दुबैमा आघात पुर्याइरहेको छ ।

स्थानीय युवा शोभाकान्त पाण्डेले भने, ‘जानकी मन्दिर हाम्रो आस्थाको केन्द्र हो । तर, आज त्यो मन्दिर मनोरञ्जनको स्थलजस्तो बनाइएको छ । धर्म, संस्कृति र श्रद्धाको ठाउँमा पटाका र आतिशबाजीले कब्जा जमाएको देख्दा अत्यन्त दुख लाग्छ । मन्दिरमा आरती र भजनको स्वर गुन्जिनु पर्छ, बारुद र धुवाँको आवाज होइन ।’

पाण्डेले थपे, ‘यो केवल एक धार्मिक स्थलको बेइज्जती नभई यो हाम्रो संस्कार र पहिचानमाथिको प्रहार हो । प्रशासन र मन्दिर व्यवस्थापनले यो अवस्था रोक्ने जिम्मेवारी लिनुपर्छ ।’

स्थानीय बुद्धिजीवी भोगेन्द्र झाले भने, ‘जानकी मन्दिर मिथिलाको हृदय हो । यहाँ भक्ति र आस्थाको स्वर गुन्जिनुपर्छ, पटका र खेलकुदको होहल्ला होइन । यो पवित्र स्थलमा मर्यादा र शान्ति कायम राख्नु हाम्रो सामूहिक कर्तव्य हो ।’

जनकपुरधामवासीहरूले मन्दिर प्रशासन, स्थानीय प्रशासन र जनकपुरधाम उपमहानगरपालिकालाई धार्मिक स्थलको मर्यादा जोगाउन तत्काल ठोस कदम चाल्न माग गरेका छन् । उनीहरूले मन्दिर क्षेत्रभित्र ध्वनि प्रदूषण, आतिशबाजी र भीड नियन्त्रणका लागि कडा नियम लागू गर्न र उल्लङ्घन गर्नेहरूलाई कारबाही गर्न आग्रह गरेका छन् ।

धार्मिक स्थलमा मनोरञ्जन र पटाका प्रदर्शन गर्ने प्रवृत्तिले मिथिलाको सांस्कृतिक पहिचानमाथि खतरा आएको भन्दै सामाजिक सञ्जालमा समेत विरोधको लहर फैलिएको छ ।