जनकपुरधाम, ४ कार्तिक । धनुषाको शहीदनगर नगरपालिकाका युवाहरूले छठ पर्वलाई मर्यादित र सभ्य ढंगले मनाउन माग गर्दै अश्लील गीत र चर्को साउण्ड सिस्टममाथि कडाइका साथ प्रतिबन्ध लगाउन प्रशासनसँग आग्रह गरेका छन् ।

शहीदनगर युवा मञ्चका प्रतिनिधिहरूले मंगलबार इलाका प्रशासन कार्यालय यदुकुहा पुगेर ज्ञापनपत्र बुझाएका हुन् । मञ्चका अगुवा लालबाबु मण्डलको नेतृत्वमा गएको टोलीमा इन्जिनियर नरेश यादव, राकेश यादव, अन्मोल भण्डारी, झगरु यादवलगायत स्थानीय युवाहरूको सहभागिता रहेको थियो ।

ज्ञापनपत्रमा छठ पर्वका अवसरमा नगर क्षेत्रभर लाउडस्पिकर र साउण्ड सिस्टमको दुरुपयोग रोक्न, अश्लील र भड्किला गीतमाथि पूर्ण प्रतिबन्ध लगाउन र धार्मिकस्थलहरूमा सुरक्षाको कडाइ सुनिश्चित गर्न माग गरिएको छ ।

युवाहरूले पछिल्ला वर्षहरूमा छठ पर्वमा धार्मिक गितको सट्टा अश्लील शब्द र दृश्ययुक्त गीतहरू सार्वजनिक स्थलहरूमा बजाइने गरेकाले सामाजिक मर्यादा, सांस्कृतिक मूल्य र धार्मिक आस्थामा आघात पुर्याएको उल्लेख गरेका छन् ।

‘संस्कृति र धार्मिक पर्वहरूलाई मर्यादित र सभ्य ढंगले मनाउन सबैले जिम्मेवारीपूर्वक व्यवहार गर्नुपर्छ । अश्लील गीत र चर्को साउण्डले समाजमा गलत सन्देश फैलाउँछ,’ ज्ञापनपत्रमा भनिएको छ ।

शहीदनगरका युवाहरूले ध्वनि प्रदूषणले वृद्ध, बालबालिका र विद्यार्थीको स्वास्थ्यमा पनि असर पुर्याउने भन्दै प्रशासनले आवश्यक कडाइका साथ निगरानी र कारबाही गर्नुपर्ने माग गरेका छन् ।

इलाका प्रशासन कार्यालय यदुकुहाका अधिकारीहरूले युवाहरूको मागबारे स्थानीय प्रशासन र सुरक्षाका निकायहरूसँग समन्वय गरी आवश्यक निर्देशन दिने तयारी भइरहेको जनाएका छन् ।

स्थानीयहरूका अनुसार विगतमा छठको अवसरमा विभिन्न टोलटोलमा अत्यधिक साउण्ड सिस्टम प्रयोग भई रातभर अश्लील गीत बजाइने, नाचगानका कार्यक्रमहरू हुने र यसले धार्मिक भावनामा ठेस पुर्याउने अवस्था देखिँदै आएको थियो ।