जनकपुरधाम, ३१ असोज । नेपालको राष्ट्रिय क्रिकेट टोलीले अन्तर्राष्ट्रिय क्रिकेट परिषद् (आईसीसी) टी–२० विश्वकपको एसिया तथा इस्ट एसिया–प्यासिफिक क्षेत्रीय छनोटको उपाधि हात पारेको छ । शुक्रबार ओमानमा सम्पन्न सुपर सिक्स चरणको अन्तिम खेलमा नेपालले सामोआलाई १२४ रनले पराजित गर्दै उपाधि जितेको हो ।

नेपालले यसअघि सुपर सिक्सको दुई खेल अगावै २०२६ मा हुने टी–२० विश्वकपमा स्थान सुनिश्चित गरिसकेको थियो । समूह चरणदेखि अपराजित रहँदै अन्तिमसम्म प्रभावशाली प्रदर्शन गरेको नेपालले पहिलो पटक क्षेत्रीय छनोटको ट्रफी जित्न सफल भएको हो ।

यसअघि नेपालले सन् २०१४ र २०२४ मा टी–२० विश्वकप खेलेको थियो । यो पटक भने नेपालले छनोट प्रतियोगिताको उपाधि समेत जित्दै नयाँ इतिहास रच्न सफल भएको छ ।

सुपर सिक्सको अंकतालिकामा नेपाल शीर्षस्थानमा रह्यो । पाँचै खेलमा जित निकाल्दै नेपालले १० अंक जोड्यो । दोस्रो स्थानमा ओमान ८ अंकसहित रहँदा तेस्रो स्थानमा संयुक्त अरब इमिरेट्स (युएई) ६ अंकका साथ रह्यो । यी शीर्ष तीन टोलीले विश्वकपमा आफ्नो स्थान पक्का गरेका छन् ।

त्यस्तै कतार ४ अंकसहित चौथो, जापान २ अंकका साथ पाँचौँ र अङ्कविहीन सामोआ अन्तिम स्थानमा रह्यो । प्रतियोगितामा कुल नौ टोली सहभागी थिए ।

टस हारेर पहिले ब्याटिङ गर्न आमन्त्रित नेपालले निर्धारित २० ओभरमा चार विकेट गुमाउँदै २११ रनको बलियो योगफल बनायो । ओपनर आशिफ शेख र दीपेन्द्र सिंह ऐरीले उत्कृष्ट अर्धशतकीय प्रदर्शन गरे ।

आशिफले ४१ बलमा सात चौका र चार छक्कासहित ६९ रनको आक्रामक पारी खेले । यस्तै दीपेन्द्र सिंह ऐरीले ३३ बलमा दुई चौका र चार छक्काको सहयोगमा ५३ रन बनाए ।

कप्तान रोहितकुमार पौडेल र लोकेश बमले पनि अन्त्यतिर उत्कृष्ट फिनिसिङ गरे । बमले १७ बलमा अविजित ३९ रन र पौडेलले १४ बलमा अविजित २१ रन जोडे ।

सामोआका बलर सौमानी ताई, डारियस भिसर, नोह मेड र डेनियस वर्गले एक–एक विकेट लिए ।

२१२ रनको लक्ष्य पछ्याउने क्रममा सामोआ २० ओभरमा ७ विकेट गुमाएर ८७ रनमै सीमित रह्यो । सामोआका सेन सोलियाले ४० रन बनाए भने बाँकी ब्याट्सम्यानहरू नेपाली बलरको नियन्त्रणमा परे ।

नेपालका ललित राजवंशीले सर्वाधिक ३ विकेट लिए । करण केसी, सन्दीप लामिछाने र कप्तान रोहित पौडेलले एक–एक विकेट झारे ।

यसअघि शुक्रबार नै भएको अर्को खेलमा ओमानले जापानलाई नौ विकेटले पराजित गरेको थियो । जापानले पहिले ब्याटिङ गर्दै १८.२ ओभरमा सबै विकेट गुमाएर १०३ रन बनाएको थियो । लक्ष्य पछ्याउँदै ओमानले १७ ओभरमा एक विकेटको क्षतिमा सहज जित निकालेको थियो ।

यस जितसँगै नेपालले टी–२० विश्वकपमा तेस्रो पटक प्रवेश मात्र नभई क्षेत्रीय छनोटको ट्रफी पहिलो पटक आफ्नो नाममा लेखाएको छ । कप्तान रोहित पौडेलको नेतृत्वमा युवा र अनुभवी खेलाडीहरूको सन्तुलित टोलीले उत्कृष्ट प्रदर्शन गर्दै देशका क्रिकेटप्रेमीलाई फेरि गौरवान्वित बनाएको छ ।