महोत्तरी, ३१ असोज । हालैको अविरल वर्षाका कारण बाढी र डुबानले प्रभावित महोत्तरी जिल्लाका एकडारा र सम्सी गाउँपालिकाका बाढीपीडितलाई राहत वितरण गरिएको छ ।

वर्ल्ड भिजन इन्टरनेशनल नेपालको सहयोगमा एकीकृत ग्रामीण विकास समाज बर्दिबास र दलित उत्थान समाज महोत्तरीको संयोजनमा ३०८ परिवारलाई राहत उपलब्ध गराइएको हो ।

राहत वितरण कार्यक्रममा एकडारा गाउँपालिकाका अध्यक्ष दीपनारायण मण्डलको विशेष उपस्थितिसहित वर्ल्ड भिजन, ग्रामीण विकास समाज र दलित उत्थान समाजका प्रतिनिधिहरूको सहभागिता रहेको थियो ।

ग्रामीण विकास समाज बर्दिबासका फिल्ड अफिसर राजीवकुमार झाका अनुसार एकडारा गाउँपालिकाका २५५ घरधुरी र सम्सी गाउँपालिकाका ५३ घरधुरीलाई राहत वितरण गरिएको हो । राहत सामग्री वितरणअघि वडाले सिफारिस गरेका बाढीपीडितहरूको पहिचान संस्थाका कर्मचारीहरूले स्थलमै पुगेर सत्यापन गरेको झाले बताए ।

राहतमा प्रत्येक परिवारलाई २५ किलो सोना मनसुली चामल, दुई किलो दाल, दुई लिटर खानेतेल, एक प्याकेट नुन, दुईवटा त्रिपाल, दुईवटा म्याट्रेस, दुईवटा कम्बल, दुईवटा डोरी र सोलार लाइटसहितका सामग्री प्रदान गरिएको थियो ।

कार्यक्रममा एकडारा गाउँपालिकाका अध्यक्ष मण्डलले बाढी र डुबानका कारण समस्यामा परेका परिवारलाई सहयोग उपलब्ध गराएकोमा वर्ल्ड भिजन इन्टरनेशनल नेपाल र अन्य सहयोगी संस्थालाई धन्यवाद दिए । उनले गाउँपालिकाले पनि प्रभावित परिवारलाई थप सहयोगका प्रयास गर्ने प्रतिबद्धता जनाए ।

कार्यक्रममा वर्ल्ड भिजन इन्टरनेशनल नेपालका दिलीपकुमार यादव, योभेन्द्र चौधरी, विनोद थापा मगर, तारा दाहाल, ग्रामीण विकास समाजका उमेश न्यौपाने, कुमार भण्डारी, ऋषि चौलागाई, दीपेश श्रेष्ठ, राजीवकुमार झा, दलित उत्थान समाजका उत्तिमचन्द्र चौधरी, देवी निरौला र सौरभ सुमनलगायतका प्रतिनिधिहरू उपस्थित थिए ।

एकडारा गाउँपालिका–३ अजमरपट्टीका बाढीपीडित शिवजी मण्डलले राहत वितरणको पहल भएकोमा खुसी व्यक्त गर्दै भने, ‘तिहार नजिकिँदै थियो । तर, बाढी आएको दश दिनसम्म कसैले खबर लिएको थिएन । अहिले आएर सहयोग पाउँदा थोरै राहत महसुस भयो ।’

गत असोज १८ देखि २० गतेसम्म लगातार वर्षाले महोत्तरी जिल्लाका अधिकांश क्षेत्र डुबानमा परेका थिए । सदरमुकाम जलेश्वरमा त पानी सुक्न सात दिन लाग्दा नगरपालिकाले विद्यालयहरूमा बिदा दिनुपरेको थियो ।

जिल्लाका रातो, भव्सी, जंगहा, माढा, अंकुसी र बिगही नदीहरूमा पानीको सतह बढेपछि जलेश्वर, बर्दिबास, औरही, भंगाहा, बलवा, रामगोपालपुर, मटिहानी र सम्सीका बस्तीहरू प्रभावित बनेका थिए । बाढी र डुबानका कारण २२८ परिवारका ८२६ जना विस्थापित भएका थिए भने जलेश्वर–६ का ११ वर्षीय बालकको मृत्यु भएको थियो ।

यसअघि सेभ द चिल्ड्रेनले पनि रातो नदीले प्रभावित जलेश्वर–१ र ८ का ११२ परिवारलाई राहत वितरण गरेको थियो ।

स्थानीय सरोकारवाला संस्थाहरूले जिल्लामा बाढीप्रति दीर्घकालीन पूर्वतयारी र जोखिम न्यूनीकरणका प्रयासलाई तीव्र बनाउन आग्रह गरेका छन् ।