महोत्तरी, ३० असोज । बिरामीको उपचारमा सहजता ल्याउन महोत्तरी जिल्लाका तीन स्वास्थ्य संस्थामा आधुनिक मेडिकल उपकरण तथा सामग्री वितरण गरिएको छ ।

वल्र्ड भिजन इन्टरनेसनल नेपालको सहयोगमा एकीकृत ग्रामीण विकास समाज बर्दिबासले उक्त सामग्रीहरू हस्तान्तरण गरेको हो ।

स्वास्थ्य उपकरण हस्तान्तरण कार्यक्रम प्रादेशिक अस्पताल जलेश्वर, प्राथमिक स्वास्थ्य केन्द्र सम्सी र पोखरभिण्डा स्वास्थ्य चौकीमा सम्पन्न गरिएको थियो ।

एकीकृत ग्रामीण विकास समाजका फिल्ड अफिसर राजीवकुमार झाका अनुसार यो सहयोग एकीकृत पोषण तथा उत्थानशील जीविकोपार्जन परियोजना अन्तर्गत स्वास्थ्य संस्था सुदृढीकरण कार्यक्रमका रूपमा गरिएको हो ।

उनले भने, ‘प्रादेशिक अस्पताल जलेश्वरलाई आठ, पोखरभिण्डा स्वास्थ्य चौकीलाई २१ र सम्सी प्राथमिक स्वास्थ्य केन्द्रलाई १३ थान स्वास्थ्य उपकरण सहयोग गरेका छौं ।’

स्वास्थ्य संस्थाहरूले उपकरणको अभावमा बिरामीहरूको उपचारमा कठिनाइ भोगिरहेका अवस्थामा यो सहयोगले ठूलो सहजता ल्याउने विश्वास गरिएको छ । झाले थपे, ‘यो सहयोगले प्रसूति, बाल स्वास्थ्य र सामान्य उपचार सेवामा गुणस्तर सुधार हुनेछ ।’

प्रादेशिक अस्पताल जलेश्वरमा डेलिभरी शय्या, पेरी लाइट, डेलिभरी सेट, पेनगुइन सक्सन, इपिआई सेट, अम्बु ब्याग, इन्स्ट्रुमेन्ट र्यापर र डस्टविन लगायतका उपकरण उपलब्ध गराइएको छ । यसको मूल्य करिब १ लाख २६ हजारभन्दा बढी रहेको छ ।

पोखरभिण्डा स्वास्थ्य चौकीका लागि पेसेन्ट बेड, इन्स्ट्रुमेन्ट ट्रली, आइभी स्ट्यान्ड लगायतका उपकरण १ लाख ८३ हजारभन्दा बढी रकम बराबर सहयोग गरिएको छ ।

त्यस्तै, सम्सी प्राथमिक स्वास्थ्य केन्द्रमा डेलेभरी शय्या, कर्ड क्ल्याम्प, बेबी र्यापर लगायतका उपकरण करिब २० हजार बराबर हस्तान्तरण गरिएको संस्थाका फोकल पर्सन उमेश न्यौपानेले जानकारी दिए ।

स्वास्थ्य उपकरण हस्तान्तरणपछि प्रादेशिक अस्पताल जलेश्वरका निमित्त कार्यालय प्रमुख डा. विकासकुमार साहले प्रसूति सेवामा यसले ठुलो सहयोग पुर्याउने बताउँदै संस्थाप्रति आभार व्यक्त गरे । उनले भने, ‘प्रसूति र नवजात शिशु सेवामा आवश्यक उपकरण पाउन गाह्रो भइरहेको बेला यो सहयोग समयानुकूल र उपयोगी छ ।’

अस्पताल सञ्चालन तथा व्यवस्थापन समितिका अध्यक्ष मिन्नु झाले अस्पतालको मेटरनिटी वार्डका कर्मचारीहरूले माग गरेका सामग्रीहरू संस्थाको सहयोगमा प्राप्त भएको बताउँदै यसले स्वास्थ्य सेवा अझ सशक्त र द्रुत बनाउने विश्वास व्यक्त गरिन् ।

कार्यक्रममा संस्थाका फोकल पर्सन उमेश न्यौपाने, प्रोग्राम म्यानेजर कुमार भण्डारी, प्रोग्राम अफिसर भूपेन्द्र निरौला, फिल्ड अफिसर राजीवकुमार झा तथा अस्पतालका चिकित्सक र कर्मचारीहरूको उपस्थिति रहेको थियो ।