सप्तरी, ३० असोज । दलित समुदायका बालबालिकाको शिक्षामा पहुँच सुनिश्चित गर्ने उद्देश्यले सप्तरीको तिरहुत गाउँपालिका–३ गोइठीस्थित श्री भवानी राधा आधारभूत विद्यालयलाई नेपाल युथ फाउण्डेशन नेपालले नयाँ चार कोठे सुविधा सम्पन्न भवन हस्तान्तरण गरेको छ ।

एक औपचारिक कार्यक्रममा गाउँपालिकाका प्रमुख प्रशासकीय अधिकृत ललनप्रसाद यादव, स्थानीय जनप्रतिनिधि, पत्रकार र समुदायका प्रतिनिधिहरूको उपस्थितिमा उक्त भवन विद्यालयका प्रधानाध्यापकलाई हस्तान्तरण गरिएको हो ।

नेपाल युथ फाउण्डेशन नेपालका कार्यक्रम संयोजक ललित गहतराजका अनुसार करिब ९५ लाख रुपैयाँ लागतमा निर्माण गरिएको उक्त भवनसँगै एक कोठे भान्सा, छात्रछात्राका लागि छुट्टाछुट्टै दुई कोठे चर्पी र कक्षामा प्रयोग हुने बेञ्च, डेक्स, टेबल, कुर्सी र पंखा लगायतका सामग्री पनि हस्तान्तरण गरिएको छ ।

कार्यक्रम संयोजक गहतराजले भने, ‘यो विद्यालयमा मुसहर समुदायका विद्यार्थीहरूको बाहुल्यता छ । कुनै पनि कारणले उनीहरू शिक्षाबाट बञ्चित नहोस् भन्ने उद्देश्यले यो पूर्वाधार निर्माण गरिएको हो ।’

उनका अनुसार विद्यालयका छात्रछात्राको सिकाइ सहज बनाउन करिब पाँच लाख रुपैयाँ बराबरका अतिरिक्त सामग्रीहरू पनि उपलब्ध गराइएको छ ।

नेपाल युथ फाउण्डेशनले यसअघि पनि सोही गाउँपालिकाको वडा नं. ३ पिपराहीस्थित रा.प्रा.वि. विद्यालयमा दुई कोठे भवन, त्रिकोल–१ स्थित विद्यालयमा दुई कोठे चर्पी र भान्सा र विभिन्न वडामा ५ वटा सामुदायिक सिकाइ केन्द्रहरू स्थापना गरिसकेको जनाएको छ ।

कार्यक्रम अधिकृत श्रीलाल सरदारका अनुसार फाउण्डेशनले विद्यालय जाने उमेरका सबै बालबालिकालाई विद्यालयमा पुर्याउने र टिकाई राख्ने उद्देश्यसहित महिला साक्षरता कार्यक्रम, विद्यालय बाहिर रहेका बालबालिकाका लागि साक्षरता कक्षा, ट्युसन कक्षा र ६ महिनादेखि ३ वर्ष ६ महिना उमेर समूहका बालबालिकाका लागि पोषण, सरसफाइ र मनोरञ्जन कार्यक्रम पनि सञ्चालन गर्दै आएको छ । साथै, आमाहरूलाई समूहमा आवद्ध गरी बचत गर्न र आत्मनिर्भर बन्ने बानी बसाल्ने कार्य पनि निरन्तर भइरहेको उनले जानकारी दिए ।

कार्यक्रममा तिरहुत गाउँपालिकाका प्रमुख प्रशासकीय अधिकृत ललनप्रसाद यादवले नेपाल युथ फाउण्डेशनले सञ्चालन गरेको ‘कास्ट इक्वीटी प्रोजेक्ट’ दलित समुदायको शिक्षामा पहुँच बढाउने प्रभावकारी पहल भएको बताए । उनले भने, ‘मुसहर समुदाय जस्ता वञ्चित वर्गका बालबालिकालाई शिक्षाको उज्यालोमा ल्याउन फाउण्डेशनको योगदान प्रशंसनीय छ । यो उपलब्धिमूलक कार्यक्रम हो ।’

विद्यालयका प्रधानाध्यापक अमोदकुमार यादवले नयाँ भवनले विद्यालयको शिक्षण वातावरणमा गुणात्मक सुधार ल्याउने विश्वास व्यक्त गरे । उनले भने, ‘कक्षाकोठाको अभावका कारण विद्यार्थीहरूलाई पढाइमा कठिनाइ भइरहेको थियो । नयाँ भवन बनेपछि सिकाइ सहज र प्रभावकारी हुनेछ ।’

कार्यक्रममा स्थानीय जनप्रतिनिधि, शिक्षक, अभिभावक र विद्यार्थीहरूको उल्लेखनीय उपस्थिति थियो । सहभागीहरूले विद्यालय भवन निर्माणमा सहयोग पुर्याउने संस्थालाई धन्यवाद दिँदै समुदायमै सकारात्मक परिवर्तन ल्याउने प्रतिबद्धता व्यक्त गरे ।