जनकपुरधाम, २८ असोज । लेग स्पिनर सन्दीप लामिछानेको उत्कृष्ट बलिङ प्रदर्शनको सहारामा नेपालले आईसीसी टी–२० विश्वकप एसिया तथा इस्ट एसिया–पेसिफिक छनोटको सुपर सिक्स चरणमा कतारमाथि ५ रनको रोमाञ्चक जित निकालेको छ ।

खेलमा नेपालले दिएको १४८ रनको लक्ष्य पछ्याउँदै उत्रेको कतार १९.५ ओभरमै १४२ रनमा अलआउट भयो । अन्तिम ओभरसम्म तानातान चलेको खेलमा सन्दीपको घातक स्पिन आक्रमणले अन्ततः नेपाललाई जित दिलायो ।

कतारका लागि ओपनर इमाल लियानागेले ३५ बलमा ५५ रनको आक्रामक पारी खेले भने जुबेर अलीले ५२ रनको योगदान दिए । तर, अन्य ब्याटरले दोहोरो अंक समेत पार गर्न नसकेपछि कतार लक्ष्य नजिक पुगेर पनि पराजित भयो ।

नेपालका लागि सन्दीप लामिछानेले ४ ओभरमा ५ विकेट लिए र मात्र २० रन खर्चिए । उनको यो प्रदर्शन नेपालका लागि निर्णायक सावित भयो । त्यसैगरी नन्दन यादवले २ विकेट र दीपेन्द्रसिंह ऐरीले १ विकेट लिए ।

यसअघि टस हारेर पहिले ब्याटिङ गरेको नेपालले कप्तान रोहित पौडेलको अर्धशतकको मद्दतमा २० ओभरमा ९ विकेट गुमाउँदै १४७ रन बनाएको थियो । कप्तान रोहितले ४१ बलमा ५८ रनको पारी खेले । उनले पाँच चौका र दुई छक्का प्रहार गरे । दीपेन्द्रसिंह ऐरीले २१ बलमा २६ रनको उपयोगी योगदान दिए भने गुलशन झाले अन्तिम समयमा ८ बलमा १६ रनको तेज पारी खेलेर स्कोर प्रतिस्पर्धी बनाएका थिए ।

कतारका बलरमध्ये कप्तान मिर्जा बेगले उत्कृष्ट प्रदर्शन गर्दै ४ ओभरमा २९ रन दिँदै ३ विकेट लिएका थिए । डानियल लुइसले पनि ३ विकेट हात पारे भने मुहम्मद असिमले १ विकेट लिए ।

यो जितसँगै नेपालले सुपर सिक्समा लगातार दोस्रो जित हात पारेको छ । यसअघि नेपालले आइतबार यूएईलाई पराजित गरेको थियो ।

यता पहिलो खेलमा ओमानसँग पराजित कतारले भने सुपर सिक्समा दुई अंक मात्र जोडेको छ ।

सन्दीपको बलिङ र रोहितको ब्याटिङले सन्तुलनमा राखेको यो जितले नेपाललाई विश्वकपको दिशामा थप उत्साहका साथ अघि बढाएको छ ।