जनकपुरधाम, २६ असोज । धनुषाको मिथिला नगरपालिकाका शिक्षकहरू तलब र भत्ता नपाएको विरोधमा आइतबारदेखि अनिश्चितकालीन धर्नामा बसेका छन् । उनीहरू ढल्केबरस्थित नगरपालिकाको कार्यालय परिसरमा बाक्लो उपस्थितिसहित धर्ना दिइरहेका छन् ।

शिक्षक आन्दोलन परिचालन समिति मिथिलाका संयोजक रामप्रसाद खरेलले नगरपालिकाले पटक–पटक माग गर्दा पनि तलब र भत्ता नदिएकाले बाध्य भएर आन्दोलनमा उत्रिनुपरेको बताए । उनका अनुसार संघीय सरकारले समयमै पठाएको शिक्षक तलबको रकम स्थानीय तहमा जनप्रतिनिधिबीचको आन्तरिक विवादका कारण रोकिएको छ ।

खरेलले भने, ‘हामीले बारम्बार ध्यानाकर्षण गराएका थियौँ । तर, सुनुवाइ भएन । दशैं–तिहार जस्ता ठूला चाडपर्वमा पनि तलब नपाउँदा शिक्षकहरू गम्भीर आर्थिक सङ्कटमा परेका छन् ।’ उनले नगरपालिकालाई तत्काल शिक्षकको तलब र भत्ता निकासा गरी शैक्षिक वातावरण सहज बनाउन आग्रह गरे ।

शिक्षकहरूको भनाइमा संघीय सरकारले प्रत्येक महिनाको तलब रकम प्रदेश र स्थानीय तहमा समयमै पठाउने गरेको छ । तर, केही नगरपालिकामा प्रशासनिक ढिलासुस्ती र राजनीतिक हस्तक्षेपका कारण रकम रोकिएर शिक्षकहरू प्रभावित हुने गरेको छ ।

उता, मिथिला नगरपालिकाका शिक्षकमध्ये कतिपयले तलब नपाएपछि विद्यालय सञ्चालनमै समस्या उत्पन्न भएको बताउँदै आएको छन् । धर्नामा सहभागी शिक्षक कमलनाथ झाले भने, ‘विद्यालय चलाउने जिम्मा हामीमाथि छ । तर, तलब नपाउँदा परिवार पाल्न गाह्रो भइरहेको छ । नगरपालिकाले अब बेवास्ता गर्न मिल्दैन ।’

नगरपालिकाले भने विवाद समाधानका लागि छलफल भइरहेको बताएको छ । स्रोतका अनुसार तलब वितरण सम्बन्धी वजेट अभिशोधन र निकासा प्रक्रियामा ढिलाइ भएकाले समस्या उत्पन्न भएको हो ।

शिक्षकहरूले माग पूरा नभएसम्म धर्ना कार्यक्रम जारी रहने चेतावनी दिएका छन् । स्थानीय बासिन्दाहरूले पनि शिक्षकको आन्दोलनप्रति ऐक्यबद्धता जनाउँदै नगरपालिकालाई तत्काल समाधान खोज्न आग्रह गरेका छन् ।