जनकपुरधाम, २६ असोज । मधेश प्रदेशको राजधानी जनकपुरधाममा अत्याधुनिक स्वास्थ्य सेवा प्रदान गर्ने लक्ष्यसहित जनकपुर मधेश अस्पताल औपचारिक रूपमा सञ्चालनमा आएको छ । जनकपुरधाम उपमहानगरपालिका–१३ स्थित अस्पतालको उद्घाटन रामानन्दीय श्री वैष्णव सङ्घका अध्यक्ष रामरोशन दास वैष्णवले गरेका हुन् ।

उद्घाटन समारोहमा वैष्णवले जनकपुरधाम धार्मिक र पर्यटकीय शहर मात्र नभई अब स्वास्थ्य सेवामा पनि उदाहरणीय बन्ने विश्वास व्यक्त गरे । उनले भने, ‘यहाँका नागरिक र तीर्थयात्री दुवैका लागि गुणस्तरीय स्वास्थ्योपचार अत्यावश्यक छ । जनकपुर मधेश अस्पतालले यो आवश्यकतालाई पूरा गर्न मद्दत पुर्याउनेछ ।’

अस्पतालका सञ्चालक चेतनारायण यादवका अनुसार जनकपुर मधेश अस्पतालले दक्ष र अनुभवी चिकित्सकमार्फत सम्पूर्ण प्रकारका स्वास्थ्य सेवा उपलब्ध गराउने लक्ष्य राखेको छ ।

अस्पतालमा २४ घण्टा आकस्मिक सेवा, दैनिक ओपिडी, स्त्री तथा प्रसूति रोग उपचार, जनरल सर्जरी र ल्याप्रस्कोपी सर्जरी, बालरोग, जनरल मेडिसिन, दन्त उपचार, आँखा, छाला, नाक–कान–घाँटी, हाडजोर्नी तथा नसासम्बन्धी उपचार र मानसिक रोग सेवा सञ्चालन गरिएको छ ।

त्यससँगै अस्पतालमा अत्याधुनिक ल्याब तथा उपकरणहरू सहितको प्याथोलोजी सेवा, भिडियो एक्स–रे र २४सै घण्टा एम्बुलेन्स सुविधा पनि उपलब्ध रहेको यादवले जानकारी दिए । उनका अनुसार जनकपुरधाम र आसपासका जिल्लाका बासिन्दाले अब उपचारका लागि बाहिर धाउनुपर्ने अवस्थाको अन्त्य गर्ने उद्देश्यले यो अस्पताल स्थापना गरिएको हो ।