बारा, २५ असोज । बाराको सिम्रौनगढ नगरपालिकामा तिहारको तयारीकै बीच दुःखद घटना घटेको छ । नगरपालिकाको नयाँ भवनको दक्षिणतर्फ माटो खन्ने क्रममा शनिबार ढिस्कोमा पुरिँदा दुई जनाको मृत्यु भएको छ भने चार जना गम्भीर घाइते भएका छन् ।

घटनास्थलमा स्थानीयवासी तिहारको अवसरमा घर सजावटका लागि माटो संकलन गर्दै थिए । त्यही क्रममा अचानक माटोको ठूलो ढिस्को भत्किँदा ६ जना मजदुर त्यसमा पुरिएका थिए । प्रहरीका अनुसार घटनापछि स्थानीयवासी र प्रहरीको सहयोगमा पुरिएका सबैलाई तत्काल उद्धार गरी उपचारका लागि कलैयास्थित प्रादेशिक अस्पताल पुर्याइएको हो ।

प्रहरी निरीक्षकले बताएअनुसार दुई जनालाई अस्पतालले मृत घोषणा गरेको छ भने चार जनाको अवस्था गम्भीर रहेको छ । घाइतेहरूमध्ये केहीको अवस्था चिन्ताजनक भएकाले थप उपचारका लागि बाहिर रेफर गर्ने तयारी भइरहेको जनाइएको छ ।

मृतक र घाइतेहरूको सनाखत हुन बाँकी रहेको जिल्ला प्रहरी कार्यालय बाराले जनाएको छ । घटनाबारे थप अनुसन्धान भइरहेको प्रहरीले जनाएको छ ।