महोत्तरी, २३ असोज । असोज १८ र १९ गतेको अविरल वर्षासँगै आएको बाढीले प्रभावित जलेश्वर नगरपालिकाका ९० घरपरिवारलाई राहत वितरण गरिएको छ । बाढीको भेलले घरवारविहीन बनाएका जलेश्वर नगरपालिका–१ का ४७ र वडा नं. ८ का ४३ घरपरिवारलाई विभिन्न राहत सामग्री वितरण गरिएको हो ।

सेभ द चिल्ड्रेनद्वारा सञ्चालित ‘समुन्नति कार्यक्रम’ अन्तर्गत साझेदार संस्था रतौलि युवा क्लबले राहत वितरण गरेको हो ।

क्लबका प्रमुख बैद्यनाथ चौधरीका अनुसार राहतस्वरूप प्रत्येक परिवारलाई त्रिपाल दुई थान, गर्मीको कम्बल एक थान, बेबी प्याक एक सेट, एल्युमिनियम भुइँ म्याट एक थान, त्रिपालको डोरी एक सेट, पानी फिल्टर एक सेट र भान्सा बनाउने भाँडावर्तन एक सेट प्रदान गरिएको छ ।

उनका अनुसार राहत सामग्रीको मूल्य औसत १० हजार रुपैयाँ बराबरको रहेको छ । चौधरीले भने, ‘जलेश्वर नगरपालिका र सम्बन्धित वडासँग समन्वय गरी बाढीले बढी प्रभावित र घरवारविहीन परिवारहरूको पहिचान गरेर राहत वितरण गरेका छौं ।’

उनका अनुसार यस वर्षको बाढीले सदरमुकाम जलेश्वरका सबै वडालाई कुनै न कुनै रूपमा असर गरेको छ । ‘पहिलो चरणमा वडा नं. १ र ८ मा राहत वितरण गरिएको छ । बाँकी वडामा पनि आवश्यकताअनुसार सहयोग पुर्याउँदै जानेछौं,’ उनले भने ।

गत असोज १८ र १९ गते रातु नदीको बाँध भत्किएपछि जलेश्वरमा बाढी पस्दा नगरका अधिकांश बस्ती डुबानमा परेका थिए । पानीको उचित निकास नहुँदा सदरमुकाम चार दिनसम्म जलमग्न रह्यो । अहिले पनि शङ्कर चौक, नगरपालिका चौक र बजराही सडकखण्डमा बाढीको पानी नघटेकाले स्थानीय बासिन्दालाई आवतजावतमा समस्या भइरहेको छ ।

जलेश्वर नगरपालिका–१ का स्थानीय कमलदेव साफी भन्छन्, ‘हामी चार दिनसम्म घरमै फँसेर बसेका थियौं । अहिले पानी केही घटेको छ । तर, घरभित्र नुनिलो हिलो र दुर्गन्धले बस्नै गाह्रो छ ।’

स्थानीय प्रशासनका अनुसार हालसम्म नगरपालिका क्षेत्रमा करिब ५०० घरपरिवार प्रत्यक्ष रूपमा बाढीबाट प्रभावित भएका छन् । नगरपालिकाले पनि राहतका लागि संघ–प्रदेश सरकारसँग थप सहयोगको माग गरेको छ ।

जलेश्वरका धेरैजसो सडक र सार्वजनिक स्थानहरू अझै पनि पानीमा डुबिरहेका छन् । विद्यालय, अस्पताल र बजार क्षेत्रका व्यवसायसमेत प्रभावित भएका छन् । राहत वितरण सुरु भए पनि पीडितहरूको पुनःस्थापनाको काम भने अझै चुनौतीपूर्ण बनेको स्थानीयहरूले बताएका छन् ।