महोत्तरी, २१ असोज । असोज १८ गतेदेखि परिरहको अविरल वर्षाले महोत्तरीको जलेश्वरस्थित जिल्ला कारागार जलमग्न बनेको छ । कारागारभित्र करिब चार फिटसम्म पानी पसेपछि कैदीबन्दीहरू असुरक्षित अवस्थामै बाँच्न बाध्य भएका छन् ।

कारागारका निमित्त प्रमुख रविन ठाकुरका अनुसार डुवानका कारण कैदीबन्दीहरूलाई बस्ने ठाँउ, खानेपानी, खाद्यान्न र शौचालयको गम्भीर समस्या उत्पन्न भएको छ । ‘पुरानो दुईतले भवनमा सबैलाई सारिएको छ । तर, खाना नपाएर कैदीहरू भोकै बस्न बाध्य छन्,’ ठाकुरले भने ।

जलेश्वर कारागारमा हाल २ सय ७५ जना कैदीबन्दी रहेका छन् । पानी कारागारको सबै ब्लकमा पसेपछि कैदीबन्दीहरूलाई अस्थायी रूपमा माथिल्लो तल्लामा राखिएको छ । तर, लगातारको वर्षा र बढ्दो पानीको स्तरले अवस्था झन् जटिल बन्दै गएको छ ।

जलेश्वर नगरपालिकाले असोज १९ गते कारागारका लागि ५० कार्टुन मिनरल पानी, ५० केजी भुजा र ५० कार्टुन चाउचाउ राहतस्वरूप उपलब्ध गराएको कारागार प्रशासनले जनाएको छ । तर, ती राहत वस्तु सीमित भएकाले सबै कैदीबन्दीका लागि पर्याप्त हुन नसकेको अधिकारीहरूले बताएका छन् ।

कारागारमा वृद्ध, महिला र दीर्घरोगी कैदीहरू समेत रहेका कारण उनीहरू स्वास्थ्य जोखिममा परेका छन् । ‘हामीलाई थप राहत, औषधि र सुरक्षित स्थानको आवश्यकता छ,’ ठाकुरले भने ।

यसअघि भदौ २४ गते जेनजी आन्दोलनका क्रममा यही जलेश्वर कारागारबाट ५ सय ७५ जना कैदीबन्दी फरार भएका थिए । प्रहरी र प्रशासनको प्रयासपछि केही कैदी आफैं फर्किएका र केही नियन्त्रणमा लिइएपछि हाल कारागारमा २ सय ७५ जना कैदीबन्दी मात्र रहेका छन् ।

स्थानीय प्रशासनले कारागारमा उद्धार, स्वास्थ्य र खानेपानी आपूर्तिको व्यवस्था गर्न पहल थालेको जनाएको छ ।