जनकपुरधाम, २१ असोज । धनधान्य र समृद्धिको देवी लक्ष्मीको आराधना गरिने कोजाग्रत पूर्णिमाको अवसरमा जनकपुरधामस्थित प्रसिद्ध जानकी मन्दिरमा मंगलबार साँझ विशेष पूजा सम्पन्न गरिएको छ ।

मिथिला परम्परा अनुसार वर्षको यो रात देवी लक्ष्मीको आगमन रात मानिने भएकाले जनकपुरधामलगायत मिथिला क्षेत्रका मठमन्दिर, घरघरमा आज बिहानैदेखि विशेष विधिपूर्वक लक्ष्मीपूजा गरिएको हो । जानकी मन्दिर परिसरमा बिहानैदेखि श्रद्धालु भक्तजनको ठूलो भीड लागेको थियो ।

मन्दिरका पुजारीहरूका अनुसार आज विशेष वैदिक मन्त्रोच्चारणका साथ जानकी, राम र लक्ष्मीको संयुक्त पूजा सम्पन्न गरिएको छ । भक्तजनहरूले दुग्ध, फलफूल, अक्षता र दीपदानका साथ आराधना गर्दै घरमा सुख, शान्ति र समृद्धिको कामना गरेका छन् ।

जनकपुरधामको मन्दिर परिसर दीप र फूलमालाले झिलमिल भएको छ । बेलुकीपख लक्ष्मी आरतीका लागि मन्दिर र वरपरका गल्लीहरूमा पनि भीड बढेको थियो ।

कोजाग्रत पूर्णिमा हिन्दू संस्कृतिमा विशेष धार्मिक र सांस्कृतिक महत्व बोकेको पर्व हो । यस दिन रातभर दीप प्रज्वलन गरी देवी लक्ष्मीको आराधना गर्ने चलन छ ।

जनकपुरधाममा यो पर्व मिथिला सभ्यताको सांस्कृतिक उत्सवका रूपमा पनि मनाइन्छ ।