जनकपुरधाम, २१ असोज । जनकपुरधाम उपमहानगरपालिका–२० स्थित ऐतिहासिक र धार्मिक महत्त्व बोकेको तेलिया पोखरीलाई अन्ततः अतिक्रमणमुक्त गरिएको छ ।

जिल्ला प्रशासन कार्यालय धनुषाको संयोजनमा सम्पन्न सर्वपक्षीय भद्र सहमतिअनुसार पोखरी वरपरको अनधिकृत संरचना हटाइएपछि जनकपुरधाम उपमहानगरपालिकाद्वारा पोखरी क्षेत्रलाई खुला र व्यवस्थित बनाउने कार्य सुरु भएको हो ।

धनुषाका प्रमुख जिल्ला अधिकारी शंकरहरि आचार्यको अध्यक्षतामा बसेको सर्वपक्षीय बैठकले पोखरीको संरक्षण र अतिक्रमणमुक्त अभियानलाई सहमतिको आधारमा अगाडि बढाउने निर्णय गरेको थियो । सोही निर्णयअनुसार आज बिहानदेखि नगर प्रमुख मनोज कुमार साहको पहलमा जनकपुरधाम–२० देवपुरा रुपैठा क्षेत्रमा रहेको तेलिया पोखरी वरपरका अतिक्रमित संरचनाहरू हटाउन थालिएको हो ।

नगर प्रमुख साहले पोखरी संरक्षणका लागि भएको यो सहमतिको स्वागत गर्दै भने, ‘तेलिया पोखरी जनकपुरधामको इतिहास, संस्कृति र पर्यावरणीय दृष्टिले अत्यन्तै महत्त्वपूर्ण छ । त्यसैले यसलाई जोगाउने र व्यवस्थित गर्ने काम उपमहानगरपालिकाको प्रमुख प्राथमिकता हो ।’

उनका अनुसार पोखरीको सौन्दर्यकरण, सरसफाइ, घेराबारा तथा वृक्षारोपणजस्ता कार्यक्रम आगामी दिनमा चरणबद्ध रूपमा सञ्चालन गरिनेछ ।

तेलिया पोखरी अतिक्रमणमुक्त भएपछि स्थानीयवासीहरू पनि खुसी भएका छन् । विगत दशकौंदेखि संरक्षणको अभावमा उपेक्षित जस्तै बनेको पोखरी अब पुनः जीवन पाउने आशा उनीहरूले व्यक्त गरेका छन् । साथै, नगर प्रमुख साहले अबदेखि कुनै पनि सार्वजनिक सम्पत्तिको अतिक्रमण सह्य नहुने बताएका छन् ।

‘हामीले जनताको हितका लागि काम गर्दै आएका छौं । सार्वजनिक जग्गा, पोखरी, पाटी–पौवा तथा ऐतिहासिक संरचनाहरूको संरक्षण गर्न उपमहानगरपालिकाले अब थप कडाइ गर्नेछ,’ उनले भने ।

तेलिया पोखरी अतिक्रमणमुक्त भएसँगै अब त्यसलाई धार्मिक पर्यटकीय स्थलको रूपमा विकास गर्न सकिने विश्वास गरिएको छ ।