महोत्तरी, २१ असोज । बिगत चार दिनदेखिको लगातार वर्षा र बाढीका कारण अवरुद्ध भएको जलेश्वर फिडरअन्तर्गतको विद्युत सेवा पुनः सुचारु गर्ने प्रयास नेपाल विद्युत प्राधिकरण जलेश्वर वितरण केन्द्रले तीव्र बनाएको छ । मंगलबार बिहानैदेखि प्राधिकरणको प्राविधिक टोली मर्मत तथा पुनःस्थापना कार्यमा खटिएको छ ।

चार दिनदेखि अवरुद्ध रहेको विद्युत सेवाका कारण प्रभावित क्षेत्रमा जनजीवन ठप्प जस्तै बनेको छ । विद्युत अभावले घरायसी कार्यदेखि लिएर स्वास्थ्य सेवा, सञ्चार, व्यवसाय र शिक्षाजस्ता क्षेत्रहरूमा प्रतिकूल प्रभाव परेको छ ।

नेपाल विद्युत प्राधिकरण जलेश्वर वितरण केन्द्रका प्रमुखका अनुसार बाढीले क्षति पुर्याएका विद्युतीय उपकरण तथा वितरण लाइनहरू मर्मत गर्न व्यापक तयारी गरिएको छ । मटिहानी नगरपालिकाको सहयोगमा वारुण यन्त्र प्रयोग गरी डुबान क्षेत्रबाट पानी हटाउने कार्य भइरहेको छ ।

‘सम्बन्धित प्राविधिक टोली अहिले पनि लगातार फिल्डमै खटिएको छ । यदि मौसमले साथ दियो भने अबको २ देखि ३ घण्टाभित्र विद्युत आपूर्ति पुनः सुरु हुनेछ भन्ने अपेक्षा गरिएको छ,’ एक जना प्राधिकरण अधिकारीले जानकारी दिए ।

स्थानीय बासिन्दाहरूका अनुसार जलेश्वर क्षेत्रमा वर्षा र बाढीका कारण हरेक वर्ष विद्युत सेवा अवरुद्ध हुने समस्या दोहोरिने गरे पनि यसपालिको समस्या लामो र पीडादायक बन्यो । चार दिनसम्म अन्धकारमा बस्नुपरेको, मोबाइल चार्ज गर्न, खानेपानी तान्न र पंखा चलाउन नपाउँदा दैनिक जीवनमा कठिनाइ आएको स्थानीयवासी बताउँछन् ।

बिजुली अवरुद्ध हुँदा विशेष गरी विद्यालय सञ्चालन, अस्पताल सेवा र इन्टरनेट पहुँचमा गम्भीर असर परेको छ । कतिपय स्थानीय व्यापारीहरूले ब्यापारिक घाटा भएको गुनासो गरेका छन् ।

स्थानीय तह तथा प्राधिकरण बीच समन्वय गर्दै आपतकालीन अवस्थाका लागि वैकल्पिक विद्युत व्यवस्था (जस्तै जेनरेटर वा सौर्य उर्जा) को पूर्व तयारी गर्नुपर्ने आवाज पनि उठ्न थालेको छ ।