सप्तरी, २० असोज । सप्तरीको राजविराज कारागारबाट जेनजी आन्दोलनको क्रममा फरार भएका कैदीबन्दीमध्ये आठ जनाले २५ दिनपछि सोमबार आत्मसमर्पण गरेका छन् । यस्तै एक फरार कैदीलाई प्रहरीले घरमै पक्राउ गरेको छ ।

गत भदौ २५ गते जेनजी आन्दोलनको क्रममा राजविराजस्थित कारागारमा तोडफोड र आगजनी गर्दै २०५ जना कैदीबन्दी फरार भएका थिए । कारागार प्रशासनका अनुसार तीमध्ये आठ जनाले सोमबार आफैं उपस्थित भई आत्मसमर्पण गरेका हुन् ।

कारागार प्रमुख गंगालाल योगीका अनुसार आत्मसमर्पण गर्ने मध्ये राजविराज कारागारबाट फरार सप्तरीको विष्णुपुर गाउँपालिका–२ निवासी ५२ वर्षीय भोलाप्रसाद यादव, महादेवा गाउँपालिका–४ का २४ वर्षीय शत्रुधन मुखिया, डाक्नेश्वरी नगरपालिका–७ का २१ वर्षीय प्रकाश चौधरी, सोही पालिकाका ५० वर्षीय राजनारायण साह, राजविराज नगरपालिका–१२ का २२ वर्षीय अरुणकुमार यादव र राजगढ गाउँपालिका–१ का ४१ वर्षीय रामानन्द यादव रहेका छन् ।

यस्तै सुनसरीको झुम्का कारागारबाट फरार भएका सप्तरीको कञ्चनरुप नगरपालिका–७ का ३७ वर्षीय पशुपति भन्ने पुष्कर महतो र सोही पालिकाको वडा नम्बर–४ का ३९ वर्षीय अमरनाथ विश्वासले पनि सोमबार आत्मसमर्पण गरेका छन् ।

यसैबीच, राजविराज कारागारबाट फरार रुपनी गाउँपालिका–२ का २४ वर्षीय कुम्भकर्ण सदा घरमै लुकेर बसेको अवस्थामा पक्राउ परेका छन् । उनलाई प्रहरीले सोमबार बिहान नियन्त्रणमा लिएको जिल्ला प्रहरी कार्यालय सप्तरीले जनाएको छ ।

फरार कैदीबन्दीहरूलाई आत्मसमर्पण गर्न कारागार प्रशासनले असोज २० गतेसम्मको अल्टिमेटम दिएको थियो । तोकिएको म्याद नाघेपछि थप कानुनी सजाय हुने चेतावनी कारागार ऐन २०७९ अनुसार दिइएको थियो ।

फरार भएका २०५ कैदीबन्दीमध्ये हालसम्म ११३ जना फर्किएका छन् भने ९२ जना अझै बेपत्ता रहेको कारागार प्रशासनले जनाएको छ । उनीहरूको खोजतलास निरन्तर जारी रहेको र सीमावर्ती क्षेत्रमा सुरक्षा निगरानी थपिएको कारागार प्रशासनका प्रमुख योगीले बताए ।

स्थानीय प्रशासनले हाल कारागार सुरक्षा व्यवस्था पुनःसुदृढीकरण, पर्खाल मर्मत तथा निगरानी क्यामेरा विस्तारका काम तीव्र रुपमा अघि बढाएको जनाएको छ ।