जनकपुरधाम, २० असोज । अविरल वर्षाले धनुषाको दक्षिणी क्षेत्रस्थित कमला नगरपालिका–१ मंगराहा गाउँलाई पूर्ण रूपमा डुबानमा पारेको छ ।

बस्ती, खेतबारी र सडकसमेत जलमग्न भएपछि स्थानीय बासिन्दा त्रसित भएका छन् । वर्षेनी दोहोरिने यो समस्या यस वर्ष झन् भयावह बनेको छ ।

असोज १७ गतेदेखि सुरु भएको निरन्तर वर्षाले मंगराहा र आसपासका गाउँमा सयौँ बिघा खेतमा पानी जमेको छ । धानबाली पूर्ण रूपमा पानीमा डुबेर सड्न थालेको छ । यसले किसानहरूको वर्षभरको लगानी र श्रम दुबैलाई गम्भीर जोखिममा पारेको छ ।

मंगराहा क्षेत्रका किसानहरू भन्छन्, ‘यो समस्या नयाँ होइन । तर, यस वर्ष निरन्तर वर्षा र पानी निकासको अभावले स्थिति असह्य बनेको छ ।’ किसान रामबाबु मुखियाले दुःख व्यक्त गर्दै भने, ‘कहिल्यै नेताहरू यहाँका किसानको पीडा बुझ्न आएका छैनन् । हरेक वर्ष हामी यही समस्या भोग्छौं । यस पटक त धानबाली सकिने अवस्थामा छ ।’

धानका बोटहरू पानीमा डुबेर रोग लाग्ने र सड्ने अवस्थामा पुगेका छन् । किसानहरूले अहिले आफ्नै प्रयासमा खेतबाट पानी निकाल्ने कोसिस गरिरहेका छन् । तर, लगातार वर्षा र निकासको उचित संरचना नहुँदा समस्या समाधान हुन सकेको छैन ।

स्थानीयवासीका अनुसार मंगराहा र आसपासका गाउँमा निकास प्रणाली नहुँदा वर्षेनी बस्तीमा पानी पस्ने गरेको छ । घरमा जमेको पानी नघट्दा सुत्ने ठाउँसमेत छैन । विद्यालय परिसर, सडक र पसलहरू पनि जलमग्न छन् ।

स्थानीयहरूले तत्काल राहत व्यवस्था, निकास निर्माण र स्थायी बाढी नियन्त्रण योजना लागू गर्न माग गरेका छन् । उनीहरूले नगरपालिका र प्रदेश सरकारसँग मंगराहा क्षेत्रमा दीर्घकालीन ड्रेनेज सिस्टम, पक्की नाला र नदी तटबन्ध निर्माण गर्न आग्रह गरेका छन् ।