जनकपुरधाम, २० असोज । सिरहा जिल्लाको कल्याणपुर नगरपालिका–८ स्थित अरङ गाउँमा पाँच दलित परिवारको घर तोडफोड तथा लुटपाटको घटनामा संलग्न रहेको आरोपमा वडा अध्यक्ष रामकिशोर यादवसहित तीन जना पक्राउ परेका छन् । जिल्ला प्रहरी कार्यालय सिरहाका अनुसार पीडित दलित परिवारको उजुरीका आधारमा वडाध्यक्ष यादवलाई नियन्त्रणमा लिइएको हो ।

पीडितहरुले दिएको जाहेरीमा १३ जनालाई प्रतिवादी बनाइएको छ । उनीहरूमाथि आपराधिक उपद्रव अन्तर्गत मुद्दा दर्ता गरिएको छ । प्रहरीले हालसम्म वडा अध्यक्ष यादवसहित तीन जनालाई पक्राउ गरेको र बाँकी अभियुक्तहरूको खोजी जारी रहेको जिल्ला प्रहरी कार्यालय सिरहाका प्रमुख प्रहरी उपरीक्षक अनन्तराम शर्माले जानकारी दिए ।

स्थानीय प्रत्यक्षदर्शीका अनुसार शुक्रबार साँझ ५ बजेतिर ठूलो पोखरीको उत्तरपट्टी डिलमा बसोबास गर्दै आएका दलित समुदायका पाँच परिवारको घरमा योजनाबद्धरूपमा हमला भएको थियो ।

शोभित पासवान, विन्दे पासवान, अशोक पासवान, राजकुमार पासवान र रासलाल पासवानको घर तोडफोड गरिएको थियो । पीडितले भने, ,‘२०–२५ जनाको समूह आएको थियो । त्यसमा राजकुमार सिंह, प्रभाष सिंह, नितेश सिंह, शैलेन्द्र सिंहलगायत अगाडि थिए । उनीहरूले घरका सामग्री लुटे, कुटपिट गरे र सम्पत्ति नष्ट गरे ।’

पीडितका अनुसार घटना प्रहरीकै अगाडि भए पनि तत्काल रोकथाम भएन । पछि मिर्चैया र सशस्त्र प्रहरीको टोली पुगेपछि समूह तितरबितर भएको थियो ।घटनाको शुरुवात असोज १ गतेको विश्वकर्मा पूजाका दिनबाट सुरु भएको बताइन्छ । अरङ बजारमा आयोजित आर्केस्ट्रा कार्यक्रममा दलित समुदाय र प्रभास सिंह समूहबीच विवाद भएको थियो । सो विवादको उजुरी पीडित पक्षले प्रहरीमा दिएका थिए । त्यसकै प्रतिशोधस्वरूप यो हमला भएको पीडित र स्थानीयको आरोप छ ।

एसपी शर्माका अनुसार अनुसन्धानकै क्रममा थप संलग्न व्यक्तिहरू फेला परेमा उनीहरूमाथि पनि कानुनी कारबाही अघि बढाइनेछ । ‘यो घटनालाई गम्भीरताका साथ हेरिएको छ । सामाजिक सद्भावमा खलल पुग्ने गरी गरिने यस्ता आपराधिक गतिविधि सह्य हुनेछैन,’ उनले भने ।

घटनापछि अरङको दलित समुदायमा त्रास फैलिएको छ । उनीहरूले स्थानीय प्रशासनसँग स्थायी सुरक्षा, क्षतिपूर्तिको माग गर्दै आएका छन् । पीडित परिवार अझै खुला आकाशमुनि छन् । बालबालिका, महिला र वृद्ध जनसंख्याले घरजग्गा गुमाएका छन् ।

‘घर छैन, लत्ताकपडा छैन, बच्चाहरू रोइरहेका छन् । प्रशासनले न्याय दिनुपर्छ,’ पीडित अशोक पासवानले भने ।

मानव अधिकारकर्मीहरू र स्थानीय नागरिक समाजले घटनाको निष्पक्ष छानबिन गरी दोषीलाई कानुनी दायरामा ल्याउन माग गरेका छन् । घटनाले जातीय विभेद र दण्डहीनताको गम्भीर संकेत दिएको भन्दै आलोचना भइरहेको छ ।