जनकपुरधाम, १८ असोज । मधेश प्रदेशको राजधानी जनकपुरधाम निरन्तरको वर्षाले जलमग्न बनेको छ । शुक्रबार रातिदेखि अविरल वर्षा जारी रहँदा जनकपुरधाम उपमहानगरपालिकाका अधिकांश बस्ती, बजार र सरकारी कार्यालय परिसर पानीले डुबानमा परेका छन् । बस्तीभित्रै पानी पसेपछि स्थानीय बासिन्दा ठूलो समस्यामा परेका छन् भने दैनिक जनजीवन अस्तव्यस्त बनेको छ ।

उपमहानगरपालिका प्रमुख मनोज साहका अनुसार वर्षेनी दोहोरिने समस्या यो वर्ष झन् गम्भीर बनेको छ । ‘पानीको उचित निकास नहुँदा शहरका मुख्य सडकदेखि आवासीय क्षेत्रसम्म डुबान भएको छ । जनताले घरभित्रै पानी जमेको गुनासो गरेका छन्,’ उनले भने ।

उनका अनुसार विशेष गरी जनकपुरधामको रामानन्दचोक, जानकी मन्दिर वरपर, राजदेवी मन्दिर रोड, सब्जी बजार, अस्पताल क्षेत्रलगायत स्थानहरूमा पानीको स्तर बढ्दै गएको छ ।

वर्षाको प्रभाव सरकारी निकायसम्म पनि पुगेको छ । मुख्यमन्त्री तथा मन्त्रीपरिषद्को कार्यालय, जिल्ला प्रशासन कार्यालय, जिल्ला प्रहरी कार्यालय, आन्तरिक राजस्व कार्यालय, हुलाक कार्यालयलगायतका सरकारी भवन परिसरमा पानी जमेको छ । केही ठाउँमा कार्यालयमा पुग्न कर्मचारीहरूले रबरका चप्पल लगाएर प्रवेश गर्नुपरेको छ ।

जनकपुरधामको प्रमुख बजार क्षेत्रहरूमा पानी पस्दा व्यवसायिक क्रियाकलाप पूर्ण रूपमा ठप्प भएका छन् । लगातारको पानी र सडक डुबानले व्यापारीले पसल खोल्न नसकेको र दैनिक उपभोग्य वस्तुको आपूर्ति पनि प्रभावित भएको जनाइएको छ ।

‘शहरको मुख्य बजार र बसपार्क क्षेत्रमा तीन फिटसम्म पानी जमेको छ । ग्राहक आउँदैनन्, पसल खोल्दा पनि पानी पस्छ,’ स्थानीय व्यापारी रामप्रसाद साहले भने ।

मधेश प्रदेशका मुख्यमन्त्री सतिश कुमार सिंहले प्रदेशका विभिन्न नदीमा जलस्तर बढ्दै गएको जनाउँदै प्रहरी र सशस्त्र बललाई पूर्ण तयारी अवस्थामा रहन निर्देशन दिएका छन् । मुख्यमन्त्री सिंहले मधेश प्रदेश प्रहरी प्रमुखसँग सम्पर्क गरी जोखिम क्षेत्रका बासिन्दालाई तुरुन्तै सुरक्षित स्थानमा सार्न आदेश दिएका हुन् ।

‘बाढी र डुबानले जनजीवन जोखिममा परेको छ । प्रशासन, सुरक्षा निकाय र स्थानीय तह सबैले समन्वय गरेर तत्काल उद्धार र राहतका उपायहरू अपनाउनुपर्छ,’ मुख्यमन्त्री सिंहले भनेका छन् ।

प्रदेश सरकारका अनुसार बागमती नदीमा अहिले करिब ५,५०० क्युसेक पानीको बहाव भइरहेको छ । यो खतराको तहभन्दा ५०० क्युसेक बढी हो । बागमती बराजका सबै ३६ ढोका खोलिएका छन् ।

मुख्यमन्त्री सिंहले भने, ‘कुलेखानी जलविद्युत् केन्द्रको बाँधका ढोका खोलिँदै गइरहेकाले बागमती नदीमा थप पानी आउनसक्छ । त्यसैले रौतहट र सर्लाहीका तटीय क्षेत्र उच्च सतर्क रहनु अत्यावश्यक छ ।’

मधेश प्रदेशका प्रहरी प्रमुख डीआईजी उमाप्रसाद चर्तुवेदीका अनुसार हालसम्म प्रदेशका कुनै पनि जिल्लामा ठूलो मानवीय क्षति भएको छैन । ‘प्रहरी, सशस्त्र प्रहरी र नेपाली सेनाका टोलीहरू सतर्क छन् । जोखिम क्षेत्रका बासिन्दालाई सचेत गराइरहेका छौं,’ उनले भने ।

सशस्त्र प्रहरीका प्रमुखका अनुसार बाढी नियन्त्रणका लागि तटबन्ध मर्मत र तत्काल उद्धार कार्यका तयारी भइरहेका छन् । स्थानीय प्रशासनले किसानहरूलाई मौसमअनुसार सतर्क रहन अपिल गरेको छ ।

जिल्ला प्रशासन कार्यालय धनुषाले पनि नदी आसपासका वासिन्दालाई सतर्क रहन आग्रह गरेको छ । कमला र रातुखोलाको सतह बढ्दै गएकोले कुनै पनि बेला पानीले तटीय क्षेत्र प्रभावित पार्न सक्ने जनाइएको छ ।

उपमहानगरपालिकाले पनि नागरिकलाई अनावश्यक आवागमन नगर्न, विद्युत् उपकरणहरू सुरक्षित स्थानमा राख्न र विद्यालयका गतिविधि अस्थायी रूपमा स्थगित गर्न अनुरोध गरेको छ ।

जनकपुरधामका स्थानीयहरू वर्षेनि दोहोरिने डुबान समस्याको स्थायी समाधानको माग गर्दै सरकारलाई दबाब दिइरहेका छन् । स्थानीयवासीको भनाइ छ, ‘पानी निकास प्रणाली सुधार नगरेसम्म जनकपुरधाम सधैं डुबानमै रहन्छ ।’