जनकपुरधाम, १८ असोज । अविरल वर्षाका कारण जनकपुरधाम उपमहानगरपालिकाभित्रका सबै निजी विद्यालयहरू असोज १९ र २० गते बन्द हुने भएका छन् ।

लगातारको वर्षाबाट उत्पन्न जोखिम र विद्यार्थी–अभिभावकको सुरक्षालाई मध्यनजर गर्दै विद्यालयहरू दुई दिनका लागि बन्द गर्ने निर्णय गरिएको हो ।

निजी विद्यालय सञ्चालकहरूको संगठन एनप्याब्सन जनकपुरधाम र प्याब्सन जनकपुरधामले संयुक्त रूपमा शनिबार सूचना जारी गर्दै विद्यालयहरू अस्थायी रूपमा बन्द रहने जानकारी दिएका हुन् ।

जनकपुरधाम र आसपासका क्षेत्रमा अविरल वर्षा भइरहेको छ । सडकका विभिन्न भागमा पानी जमेको, विद्यालयपरिसरमा हिलो र फोहोरको मात्रा बढेको र साथै यातायातमा अवरोध भएका कारण विद्यार्थीहरूको विद्यालय आवतजावत जोखिमपूर्ण बनेको छ ।

एनप्याब्सन जनकपुरधामका नगर अध्यक्ष दिपक कुमार ठाकुर र प्याब्सन जनकपुरधामका नगर अध्यक्ष रविन्द्र कुमार चौधरीले संयुक्त विज्ञप्तिमा भनेका छन्, ‘विद्यार्थी र अभिभावकको सुरक्षालाई सर्वोच्च प्राथमिकता दिँदै असोज १९ र २० गते सबै निजी विद्यालय बन्द राख्ने निर्णय गरिएको हो । यो निर्णय जनस्वास्थ्य र सुरक्षाको दृष्टिले आवश्यक र जिम्मेवार कदम हो ।’

उनीहरूले थप भने, ‘वर्षाको कारण विद्यालय परिसर र सडकहरूमा पानीको मात्रा बढेकाले दुर्घटना र स्वास्थ्य जोखिम बढ्ने सम्भावना रहेको छ । यसैले विद्यालय सञ्चालन स्थगित गरिएको हो ।’

विद्यालयहरू बन्द रहने अवधिमा सञ्चालनमा रहेका सबै शैक्षिक र पाठ्येतर कार्यक्रमहरू पनि स्थगित गरिएको छ । यसमा परीक्षा, खेलकुद, प्रशिक्षण, अभिभावक बैठक र अन्य विद्यार्थीगत क्रियाकलापहरू समावेश हुने जनाइएको छ ।

विद्यालय सञ्चालकहरूले विद्यार्थी, शिक्षक र अभिभावकलाई वर्षाको बेला अनावश्यक यात्रा नगर्न, सम्भावित जोखिम क्षेत्रबाट टाढा रहन र स्थानीय प्रशासनका निर्देशनको पालना गर्न आग्रह गरेका छन् ।