जनकपुरधाम, १७ असोज । जनकपुरधाम उपमहानगरपालिका–२० देवपुरा रूपैठामा दशैं समापनपछि फेरि दुई समुदायबीच तनाव चर्किएको छ । दुर्गादेवीको प्रतिमा सेलाउन जाने क्रममा शुक्रबार साँझ भएको विवाद हिंसात्मक रूप लिएपछि स्थानीय प्रशासनले तत्कालीन प्रभावले लागू हुने गरी अनिश्चितकालका लागि निषेधाज्ञा जारी गरेको हो ।

प्रहरीका अनुसार दुर्गाको प्रतिमा विसर्जन गर्ने क्रममा अर्को समुदायले ढुङ्गामुढा गरेपछि झडप सुरु भएको थियो । यसक्रममा आक्रोशित भीडले तेलिया पोखरीको डिलमा निर्माण गरिएको टहरामा आगजनी गरेको र केही घरमा समेत आगो लगाउने प्रयास गरेको पुष्टि भएको छ ।

जिल्ला प्रहरी कार्यालय धनुषाका सूचना अधिकारी प्रहरी निरीक्षक सञ्जिव यादवका अनुसार झडप नियन्त्रणमा लिन प्रहरीले २३ राउन्ड अश्रुग्यास प्रहार गरेको थियो । घटनामा ढुङ्गामुढाबाट केही प्रहरी र स्थानीय घाइते भएका छन् ।

अवस्था नियन्त्रण बाहिर जाने देखिएपछि धनुषाका प्रमुख जिल्ला अधिकारी शंकरहरि आचार्यले जनकपुरधाम–२० देवपुरा रूपैठाभित्र साँझ ६ः३० बजेदेखि लागू हुने गरी निषेधाज्ञा आदेश जारी गरेका छन् ।

निषेधाज्ञा क्षेत्र पूर्वतर्फ लोहना जाने बाटोदेखि, पश्चिमतर्फ बसहिया जाने बाटोसम्म, उत्तरतर्फ सिक्सलेनमा रहेको बाबा पेट्रोल पम्पदेखि दक्षिणतर्फ गंगुली पुलसम्मका क्षेत्रलाई समेटिएको प्रशासनले जनाएको छ ।

जिल्ला प्रशासन कार्यालयले स्थानीय प्रशासन ऐन, २०२८ को दफा ६ को उपदफा (३क) बमोजिम निषेधाज्ञा जारी गरेको छ । यस अवधिमा सभा, जुलुस, प्रदर्शन, धर्ना, घेराउ, भेला, तोडफोड वा आगजनीजस्ता गतिविधि गर्न कडाईका साथ प्रतिबन्ध गरिएको छ । आदेशको उल्लंघन गर्ने वा कार्यान्वयनमा अवरोध गर्नेहरूमाथि कानुन बमोजिम कडा कारबाही गरिने चेतावनी दिइएको छ ।

यसअघि गत भदौ दोस्रो सातामा समेत गणेश पूजाको मूर्ति विसर्जन गर्ने क्रममा यस्तै विवाद भएको थियो । एक समुदायले पोलमा राखेको झण्डा अर्को समुदायले हटाउन खोज्दा झडप भएको थियो । त्यसबेला पनि स्थिति संवेदनशील बन्दै गएपछि स्थानीय प्रशासनले हस्तक्षेप गर्नुपरेको थियो ।

भदौ १६ गते मात्र सर्वपक्षीय बैठक बसेर दुवै पक्षबीच सद्भाव कायम गर्ने सहमति भएको थियो । तर, केही सातामै पुनः विवाद सतहमा आउनु समुदायबीचको विश्वास निर्माण अझै चुनौतीपूर्ण रहेको प्रष्ट भएको स्थानीयबासी बताउँछन् ।

धनुषा प्रशासनले हाललाई अवस्था नियन्त्रणमा रहेको जनाए पनि संवेदनशीलताका कारण अतिरिक्त सुरक्षाकर्मी परिचालन गरिएको छ । सम्भावित अप्रिय घटना रोक्न रातभर गस्ती बढाइएको छ ।

प्रमुख जिल्ला अधिकारी आचार्यले शान्ति–सुरक्षा कायम गर्न सबै पक्षलाई संयमित रहन आग्रह गर्दै भने, ‘समुदायबीचको सद्भाव खल्बल्याउने जुनसुकै प्रयासलाई प्रशासनले कानुनको कठघरामा ल्याउनेछ ।’