जनकपुरधाम, १७ असोज । मधेश प्रदेशको राजधानी जनकपुरधामको सौन्दर्य र पैदल यात्रुको सहज गतिशीलतालाई प्रभावित पार्दै आएको अव्यवस्थित फुटपाथ कब्जा अन्त्य गर्ने अभियान जनकपुरधाम उपमहानगरपालिकाले सुरु गरेको छ ।

उपमहानगरपालिकाको नगर प्रहरी टोलीले शुक्रबार बिहान १० बजेदेखि रेल्वे स्टेशन क्षेत्रदेखि फुटपाथ खाली गराउने अभियान प्रारम्भ गरेको हो । माइकिङ गर्दै व्यापारीलाई फुटपाथमा राखिएका सामान तत्काल आफ्ना सटरभित्र राख्न आग्रह गरिएको थियो । अभियान भानुचोकसम्म पुगेपछि अचानक परेको पानीका कारण केहीबेर स्थगित भए पनि फेरि जारी गरिएको नगर प्रहरी प्रमुख नितेश रायले जानकारी दिए ।

जनकपुरधामका अधिकांश फुटपाथ व्यापारी स्वयंले कब्जा गरेका छन् । सडक छेउका पसलेहरुले सटर हुँदाहुँदै पनि सामान बाहिर निकालेर फुटपाथमै व्यापार गर्न थालेपछि सर्वसाधारण बाध्यतावश सवारी चल्ने सडकबाट हिँड्नुपर्ने अवस्था सिर्जना भएको छ । नगर प्रहरी प्रमुख रायले भने, ‘फुटपाथ पैदल यात्रुको लागि निर्माण गरिएको हो । तर, व्यापारीहरुको चरम दुरुपयोगले यहाँ सर्वसाधारण जोखिमपूर्ण यात्रामा बाध्य छन् ।’

उनले स्टेशनचोक क्षेत्रमा केही व्यापारीले सामान हटाउन अटेरी गरेको पनि गुनासो पोखे । उपमहानगरपालिकाले पहिलो दिन आग्रह मात्रै गर्ने र शनिबारदेखि नियम पालना नगर्नेहरुको सामान जफत गर्ने चेतावनीसमेत दिएको छ ।

भानुचोकदेखि कदमचोक सडक खण्डसम्मका फुटपाथमा सामान मात्र नभई व्यापारीहरुले आफ्ना मोटरसाइकल, साइकल र ठेलासमेत राखेर पूर्ण अवरोध सिर्जना गरेको नगर प्रहरीले जनाएको छ ।

त्यस्तै विद्यापतिचोक, रामचोक, जनकचोक, शिवचोक, भानुचोकलगायत स्थानमा त सटरमै पसल हुँदाहुँदै फुटपाथमै चिया पसल, तरकारी पसल र साना व्यापार सञ्चालन गरिएको छ । यसले पैदल यात्रु मात्र नभई सवारी चालकलाई समेत समस्यामा पार्दै अनावश्यक ट्राफिक जामको अवस्था सिर्जना गरेको हो ।

जनकपुरधाम उपमहानगरपालिकाका मेयर मनोज साहले यो अभियान निरन्तर अघि बढाइने स्पष्ट पारेका छन् । उनले भने, ‘फुटपाथ कब्जा गरेर शहरलाई अस्तव्यस्त बनाउन दिनेछैनौँ । व्यापारीले अटेरी गरे कानुन अनुसार कडाभन्दा कडा कारबाही हुन्छ ।’

उनका अनुसार फुटपाथ खाली अभियानलाई असफल बनाउन खोज्नेहरु विरुद्ध प्रहरी प्रशासन र सरोकारवाला निकायहरुसँग समन्वय गरी कठोर कदम चालिनेछ ।

नगर प्रहरी मात्र नभई ट्राफिक प्रहरी कार्यालय धनुषा, जनकपुरधाम उद्योग वाणिज्य संघ र अन्य सरोकारवाला निकायहरुले पनि फुटपाथ कब्जा विरुद्ध ठोस कदम चाल्नु पर्ने आवश्यकता औंल्याएका छन् ।

फुटपाथ कब्जासँगै शहरको अर्को ठूलो समस्या भनेकै अव्यवस्थित पार्किङ हो । शहरको मुख्य व्यापारिक क्षेत्रदेखि सार्वजनिक स्थलसम्म सवारी पार्किङ गर्ने प्रवृत्तिले पनि जनकपुरधामको स्वरूप कुरुप देखिनुका साथै सर्वसाधारणलाई असुविधा हुने गरेको छ ।