सर्लाही, १५ असोज । सर्लाहीको हरिपूर्वा नगरपालिका–१ हर्दी खोलामा बुधबार बिहान माटोको ढिस्कोमा पुरिँदा चार जनाको ज्यान गएको छ । चाडपर्वमा पूजापाठका लागि माटो लिन गएका तीन बालबालिका र एक वृद्धा घटनास्थलमै मृत फेला परेका हुन् ।

जिल्ला प्रहरी कार्यालय सर्लाहीका सह–प्रवक्ता प्रहरी निरीक्षक बालिष्टर सिंहका अनुसार मृत्यु हुनेमा महोत्तरी सोनमा गाउँपालिका–६ मगरथानाका ६५ वर्षीया सायदा खातुन, ६ वर्षीया सबिबा खातुन, ८ वर्षीय डिल्लु मन्सुर र ९ वर्षीया नर्गिस खातुन रहेका छन् ।

प्रहरीका अनुसार मृतकहरूलाई घटनास्थलमै अचेत अवस्थामा फेला पारिएपछि प्रादेशिक अस्पताल मलङ्गवा पुर्याइए पनि चिकित्सकले मृत घोषणा गरेका थिए ।

स्थानीय धर्मेन्द्र पासवानका अनुसार चाडपर्वमा पूजापाठका लागि ६ जना व्यक्ति माटो लिन खोलातर्फ गएका थिए । खोला किनारमा खुर्पीले माटो खन्दै गर्दा एक्कासी ठूलो ढिस्को खसेर उनीहरूलाई थिचेको थियो । दुर्घटनामा परेकामध्ये दुई जना भने भाग्न सफल भएका थिए ।

सुरक्षित रहेका ती दुई जनाले तत्काल गाउँलेलाई खबर गरेपछि स्थानीयहरू घटनास्थल पुगेका थिए । तर, ढिस्कोमा पुरिएकामध्ये चार जनाको जीवन बचाउन सकिएन ।

प्रहरी निरीक्षक सिंहले घटनाबारे थप अनुसन्धान भइरहेको जनाएका छन् । उनका अनुसार मृतकको शवलाई पोस्टमार्टमका लागि प्रादेशिक अस्पताल मलङ्गवा पठाइएको छ ।

यस दुर्घटनाले दशैँ पर्वको उमंगमाझ सोनमा गाउँ शोकमग्न बनेको छ । स्थानीयहरूले खोलामा अव्यवस्थित ढंगले माटो खन्ने प्रचलनले प्रायः दुर्घटनाको जोखिम बढाउने भएकाले सम्बन्धित निकायले सुरक्षित व्यवस्थापन गर्नुपर्ने सुझाव दिएका छन् ।