जनकपुरधाम, १४ असोज । महाअष्टमी तथा कालरात्रिको अवसरमा जनकपुरधामको धार्मिक वातावरणमा यस वर्ष पनि भक्तजनको लागि विशेष सामाजिक र धार्मिक सेवाको परम्परा निरन्तरता पाइरहेको छ ।

मसाला कटेजका सञ्चालक तथा समाजसेवी विश्वनाथ साहको पहलमा श्रीराम युवा कमिटीले आयोजना गरेको निःशुल्क भोजन कार्यक्रममा यस वर्ष करिब ५ हजारभन्दा बढी श्रद्धालु भक्तजनले प्रसाद ग्रहण गरेका छन् ।

महाअष्टमीको दिन विशेषगरी राजदेवी मन्दिर र वरपरका शक्तिपीठहरूमा हजारौँ भक्तजन पूजाआराधनाका लागि आउने गर्छन् । उनीहरूलाई धार्मिक आस्थासँगै आतिथ्य सत्कार गर्ने उद्देश्यले दाता साहले सुरु गरेको भोजन परम्परा अहिले दुई दशकभन्दा बढी समय पार गरिसकेको छ । श्रीराम युवा कमिटीले प्रत्येक वर्ष यो जिम्मेवारी सम्हाल्दै निरन्तरता दिँदै आएको छ ।

यस वर्ष पनि हजारौँ मानिसहरूले पूजा आराधना पछि श्रीराम युवा कमिटीद्वारा सञ्चालित भोजन शिविरमा भोजन ग्रहण गरेका थिए । भक्तजनले यस प्रकारको सामाजिक सेवाले धार्मिक यात्रालाई सहज र पवित्र बनाउने उल्लेख गर्दै आयोजकप्रति आभार व्यक्त गरेका छन् । भोजनमा विशेषगरी पुर्ण शाकाहारी प्रसाद, फलफूल तथा मिठाईहरू समावेश गरिएको थियो ।

दाता विश्वनाथ साह धार्मिक तथा सामाजिक गतिविधिमा निरन्तर सक्रिय समाजसेवीको रूपमा चिनिन्छन् । उनले भने, ‘भक्तजनलाई महाअष्टमीमा भोजन गराउनु मात्र सेवा नभई यो हाम्रो धर्म र संस्कृतिप्रति समर्पण हो ।’ उनले आगामी वर्षहरूमा अझ प्रभावकारी रूपमा यो अभियानलाई निरन्तरता दिने प्रतिबद्धता पनि जनाएका छन् ।

भोजन कार्यक्रम केवल पेटभर्ने व्यवस्था मात्र नभई सामाजिक सद्भाव र सहकार्यको उदाहरणको रूपमा लिइएको छ । श्रीराम युवा कमिटीका पदाधिकारीका अनुसार यस्तो कार्यले समुदायलाई एकताबद्ध गर्न र धार्मिक पर्वलाई अझ अर्थपूर्ण बनाउन ठूलो योगदान पुर्याएको छ ।

तस्बिरहरू : घनश्याम मिश्र