जनकपुरधाम, १४ असोज । दशैँको अवसरमा जनकपुरधामको प्रसिद्ध राजदेवी मन्दिरमा अष्टमीका दिन हुने पूजा–आराधना विशेष र संवेदनशील मानिन्छ । यस वर्ष व्यवस्थापन समितिले यस दिन मन्दिरभित्र प्रवेशमा कडाइ गर्ने निर्णय गरेको छ ।

महावीर युवा कमिटीले गरेको विशेष निर्णयअनुसार अष्टमीका दिन पश्चिम गेटमार्फत कुनै पनि कमिटी सदस्य, कार्यकर्ता वा तिनका आफन्तलाई विशेषाधिकार प्रयोग गरेर मन्दिरभित्र पस्न दिइने छैन ।

महावीर युवा कमिटीका महासचिव भरत कुमार साहका अनुसार यदि कोही सदस्य वा कार्यकर्ता आफन्तलाई विशेष सुविधा दिँदै पश्चिम गेटमार्फत मन्दिरभित्र प्रवेश गराउन खोजेको फेला परेमा सो सदस्यलाई एक वर्षका लागि सदस्यता खारेज गरिनेछ ।

राजदेवी मन्दिरमा प्रत्येक वर्ष हजारौँ भक्तजन दर्शनका लागि आउने गर्छन् । अष्टमीको दिन विशेष महत्त्वका कारण भीड असाध्यै बढ्ने हुँदा व्यवस्थापनमा चुनौती थपिन्छ । यसअघि कतिपय अवस्थामा समितिका सदस्य वा आफन्तले पछाडिबाट विशेष पास प्रयोग गरेर मन्दिरमा पस्ने गरेका आरोप उठ्दै आएका थिए ।

यस्तो असमान व्यवहारका कारण सामान्य दर्शनार्थीहरू लामो लाइनमा उभिन बाध्य हुँदा असन्तुष्टि बढेको थियो । त्यसैले यस वर्ष समितिले कडाइ गर्ने निर्णय लिएको बताइएको छ ।

महावीर युवा कमिटीले यस निर्णयको मुख्य उद्देश्य भक्तजनलाई समान व्यवहार गर्दै सहज पूजा वातावरण बनाउन रहेको स्पष्ट पारेको छ ।

‘माता राजदेवीको दरबारमा सबै बराबर छन् । भक्तजनलाई घण्टौँ लाइनमा उभ्याएर आफ्ना सदस्य वा आफन्तलाई विशेष प्रवेश दिने चलनले धार्मिक संस्कारमाथि नै प्रश्न उठाउँछ । यसलाई अन्त्य गर्न हामीले कठोर नियम ल्याएका हौँ,’ महासचिव साहले भने ।

महावीर युवा कमिटीले यसअघि नै स्वयंसेवक परिचालन, महिला र पुरुषलाई छुट्टाछुट्टै लाइन, बलिको रसिद प्रणाली जस्ता व्यवस्थामा सुधार ल्याएको थियो । यस वर्ष थपिएको नियमले पारदर्शिता र अनुशासनमा बल पुग्ने विश्वास समितिले व्यक्त गरेको छ ।