जनकपुरधाम, १४ असोज । दशैँको अवसरमा जनकपुरधामस्थित प्रसिद्ध राजदेवी मन्दिरसहितका अन्य शक्तिपीठहरूमा सोमबार बिहानदेखि खोइँछ भर्ने धार्मिक परम्परा सुरु भएको छ ।

बिहानैदेखि सुरु भएको यो क्रियाकलाप राजदेवी मन्दिरमा आज साँझसम्म निरन्तर चल्नेछ भने आसपासका अन्य शक्तिपीठहरूमा भोलिसम्म निरन्तर रहनेछ ।

खोइँछ भर्ने परम्परा विशेषगरी विवाहित महिलासँग जोडिएको छ । उनीहरूले आफ्ना सन्तानको दीर्घायु र श्रीमानको दीर्घजीवनको कामना गर्दै भगवतीलाई खोइँछ चढाउँछन् ।

नयाँ सारी, चुरापोते, सिन्दुर, पान–सुपारी, चामल, पैसा लगायतका शौभाग्य सूचक सामग्री सजाएर विवाहित महिलालाई भगवतीकै रूप मानी खोइँछ भर्ने चलन रहिआएको छ ।

राजदेवी मन्दिरमा पूजाको व्यवस्थापन महावीर युवा कमिटीले गरिरहेको छ । भीड व्यवस्थापनका लागि ठूलो संख्यामा स्वयंसेवक परिचालन गरिएको छ । पुरुष र महिलाहरूलाई छुट्टाछुट्टै लाइनमा उभ्याएर पूजा–आराधना गर्ने सुविधा मिलाइएको छ ।

स्वयंसेवकहरूले दर्शनार्थीलाई सहज रूपमा पूजा गर्न मद्दत गरिरहेका छन् भने स्थानीय प्रहरी प्रशासनले पनि सुरक्षाका लागि विशेष व्यवस्था मिलाएको छ ।

बोकाबलीको तयारी
आज साँझदेखि राजदेवी मन्दिरमा परम्परागत बोकाबली दिने कार्यक्रम सुरु हुनेछ । यसअघि नै बलिको रसिद काट्ने काम सुरु गरिएको छ । भक्तजनहरूले श्रद्धापूर्वक बलि चढाउने तयारी गरेका छन् ।

राजदेवीसहितका शक्तिपीठहरूमा सोमबार बिहानदेखि नै भक्तजनको ठूलो भीड देखिएको छ । कतिपय भक्तजन बिहानैदेखि लामो लाइनमा उभिएर भगवतीको दर्शन गर्न पुगेका छन् ।

स्थानिय व्यापारीहरूले पनि भक्तजनको चहलपहल बढेसँगै पसलमा चहलपहल बढेको बताएका छन् । चुरापोते, मिठाई, पूजा सामग्री बेच्ने पसलहरूमा भीड लागेको छ ।

राजदेवी मन्दिर जनकपुरधामको प्रमुख धार्मिक स्थल मात्र नभई मिथिलाको सांस्कृतिक र सामाजिक एकताको प्रतीक मानिन्छ । दशैँको अवसरमा यहाँ हुने पूजा–आराधना र खोइँछ चढाउने परम्पराले मिथिला क्षेत्रकै धार्मिक परम्परालाई बलियो बनाएको स्थानीय पण्डितहरू बताउँछन् ।

भक्तजनले व्यवस्थापनलाई यस वर्ष व्यवस्थित भएको भन्दै प्रशंसा गरेका छन् । भीडभाडबीच पनि सहज रूपमा पूजा गर्न पाएको अनुभव सुनाउँदै एक महिला श्रद्धालुले भनिन्, ‘राजदेवी माईकै कृपा हो, यसरी पूजा गर्न पाइयो भने हाम्रो परिवार सुरक्षित हुन्छ भन्ने विश्वास छ ।’

तस्बिर : खबर मैथिली