जनकपुरधाम, १० असोज । दशैं मेलाको अवसरमा जनकपुरधामको प्रसिद्ध राजदेवी मन्दिर प्रांगणमा झुला भाँचिँदा ठूलो दुर्घटनाको जोखिम टरेको छ । समयमै गरिएको उद्धारका कारण ५६ जना सकुशल बचाइएका छन् ।

शुक्रबार साँझ मेलामा सहभागी धेरै मानिस झुलामा चढेका बेला झुला अचानक बीचबाटै भाँचिएको थियो । झुला भाँचिएपछि त्यसमा चढेका महिला २० र पुरुष ३६ सहित कूल ५६ जना फसेका थिए । त्यसपछि त्यहाँ हाहाकार मच्चिएको थियो ।

नेपाली सेनाको विशेष टोलीले बारुण यन्त्र र क्रेनको सहयोगमा करिव ५ घण्टापछि सबैको सकुशल उद्धार गरेको हो । ‘क्रेनको सहायताले मानिसहरूलाई सुरक्षित रूपमा झारियो,’ उद्धारमा संलग्न एक अधिकारीले भने ।

झुलामा अत्यधिक भार परेका कारण चल्ने क्रममा बीचमै भाँचिएको हुन सक्ने एक स्थानीयले बताए ।

स्थानीय शोभाकान्त पाण्डेले भविष्यमा यस्ता मेलामा प्रयोग हुने सामग्रीप्रति बढी सतर्कता अपनाउनुपर्ने बताएका छन् । उनले भने, ‘सर्वसाधारणको ज्यानसँग खेलवाड हुने खालका उपकरणको प्राविधिक परीक्षण अनिवार्य गर्नुपर्छ, यसपटकको घटना ठूलो दुर्घटनाबाट जोगिनु राहतको कुरा हो ।’

घटना नियन्त्रणमा आएपछि स्थानीय प्रशासनले मेलामा प्रयोग भइरहेका अन्य झुला तथा मनोरञ्जन सामग्रीको तत्काल सुरक्षा समीक्षा गर्ने तयारी गरेको जनाएको छ ।