जनकपुरधाम, १० असोज । भारतको बिहार राज्य, दरभंगा जिल्लाको मणिगाछि ब्लकस्थित नेहरा गाउँमा दाइजो नपाएको बहानामा रजनीश ठाकुरले आफ्नो श्रीमतीको कुटपिट गरी हत्या गरेका छन् । घटना गत शनिबार राति भएको थियो भने मृतकको उपचारका क्रममा आइतबार मृत्यु भयो ।

घटनामा रजनीश ठाकुरसँगै उनका बाबु ब्रजकिशोर ठाकुर पनि संलग्न रहेको बताइएको छ । मृतक महिला ३४ वर्षीया थिइन् । उनका छोरी र दुई छोरा छन् ।

घटनापछि नेहराको सुनार समुदायले आपत्ति जनाउँदै तत्काल बैठक बोलाएको छ । बैठकमा दोषी परिवारलाई सामाजिक बहिष्कार गर्ने निर्णय भएको छ । दोषी परिवारसँगको सबै सामाजिक सम्बन्ध तोडिएको छ भने सञ्चारमाध्यममा पनि उनीहरूमाथि प्रतिबन्ध लगाइएको छ । सुनार समुदायसहित अन्य जातिहरूले पनि यस कदमलाई समर्थन गरेका छन् ।

जनकपुरधामका प्रमुख व्यापारी तथा सामाजिक कार्यकर्ता पवन कुमार ठाकुरका अनुसार मृतक महिलाको विवाह २०११ मा रजनीश ठाकुसँग धुमधामका साथ सम्पन्न भएको थियो । विवाहपछि दाइजोका लागि दबाब दिइँदै आएको थियो । पवनकुमार ठाकुरले विवाहका बेला छोरीको खुशीको लागि आर्थिक सहयोग पनि गरेका थिए ।

घटनाअघि रजनीशले मृतकलाई ठूलो रकम ल्याउन दबाब दिएका थिए । तर, उनले फोनमार्फत बुबासँग सम्पर्क गरिनन् । यही रिसमा रजनीशले आफ्नी श्रीमतीमाथि आक्रमण गरेका थिए ।

स्थानीयवासी तथा सामाजिक कार्यकर्ताहरूले यस प्रकारको हिंसालाई अस्वीकार गर्दै कानूनी कारबाहीको माग गरेका छन् । घटनाले परिवार र समुदायमा ठूलो आक्रोश र शोक सिर्जना गरेको छ ।