सप्तरी, ९ असोज । चाडपर्व नजिकिँदै गर्दा सप्तरीको राजविराज बजारमा प्रशासनले अनुगमनलाई तीव्र बनाएको छ ।

जिल्ला प्रशासन कार्यालय सप्तरीको नेतृत्वमा प्रारम्भ गरिएको अनुगमन अभियानमा विभिन्न सरकारी निकायका प्रतिनिधिहरू सहभागी छन् ।

अनुगमन टोलीको नेतृत्व प्रशासकीय अधिकृत जितेन्द्र कुमार पासवानले गरेका छन् । टोलीले राजविराजका किराना पसलहरूमा छापा मार्दा म्याद गुज्रिएका पेय पदार्थसहित उपभोक्तालाई हानी पुर्याउन सक्ने सामानहरू फेला पारेको छ ।

जिल्ला प्रशासन कार्यालयका नायब सुब्बा सुशील कर्णका अनुसार म्याद गुज्रिएका फेन्टा, स्प्राइट, कोक लगायतका पेय पदार्थ पसलमा बिक्रीका लागि राखिएको अवस्थामा बरामद गरिएको थियो । अनुगमन टोलीले ती सबै सामग्री तत्काल नष्ट गरेको छ ।

‘अबदेखि म्याद गुज्रिएका वा गुणस्तरहीन सामान बिक्री गरेको फेला परेमा कानुनी प्रक्रिया अघि बढाएर कारबाही गरिनेछ,’ कर्णले चेतावनी दिए ।

स्थानीयले अनुगमनको अभावमा उपभोक्ताहरू गुणस्तरहीन तथा म्याद गुज्रिएका सामान किन्न बाध्य हुने गुनासो गरेका छन् । विष्णुपुर गाउँपालिका–६ का विजय देवले भने, ‘नियमित बजार अनुगमन भए उपभोक्ता सचेत हुने र ठगिनबाट जोगिने विश्वास छ । चाडपर्वको बेला मात्र नभएर वर्षभर पालैपालो सबै पसलमा अनुगमन गर्नुपर्छ ।’

बजार अनुगमन टोलीमा नेपाल पत्रकार महासंघका पूर्वअध्यक्ष बैद्यनाथ झा, जिल्ला प्रहरी कार्यालय सप्तरीका प्रतिनिधि, घरेलु तथा साना उद्योग कार्यालय, खाद्य तथा गुण नियन्त्रण कार्यालय, कर सेवा केन्द्र राजविराजलगायतका सरोकारवाला निकायका प्रतिनिधिहरू सहभागी छन् ।

अनुगमन टोलीका अनुसार दशैं र तिहारका बेला उपभोक्ता बढी ठगिन सक्ने सम्भावना हुने भएकाले आगामी दिनमा अनुगमन अझ कडाइका साथ निरन्तर गर्ने योजना बनाइएको छ ।