पर्सा, ९ असोज । पर्सा जिल्लाका दुई प्रमुख सरकारी अस्पताल, नारायणी र पोखरिया अस्पतालमा विगत लामो समयदेखि रेबिजविरुद्धको जीवनरक्षक खोप (एआरभी) को चरम अभाव देखिएको छ ।

अस्पतालका अनुसार नारायणी अस्पतालमा करिब चार महिनादेखि र पोखरिया अस्पतालमा तीन महिनादेखि रेबिज खोप सकिएको छ । विगत आठ महिनादेखि नै जिल्लाका सरकारी स्वास्थ्य संस्थामा यो खोपको उपलब्धतामा संकट छ ।

एआरभी अभावका कारण कुकुर, बिरालो वा स्यालको टोकाइबाट जोखिममा परेका बिरामीहरू जीवनको प्रत्यक्ष खतरा सामना गर्न बाध्य छन् । उनीहरू निजी स्वास्थ्य संस्थामा महँगो शुल्क तिर्ई खोप लिन बाध्य भएका छन् ।

पोखरिया अस्पतालका मेडिकल सुपरिटेन्डेन्ट आनन्द रौनियारले प्रदेश स्वास्थ्य आपूर्ति व्यवस्थापन केन्द्रमा बारम्बार जानकारी गराए पनि अहिलेसम्म खोप नपठाइएको गुनासो गरे । उनले भने, ‘खोप नहुँदा सेवाग्राहीहरू रित्तै हात फर्किनुपर्ने बाध्यता छ । यसले जनस्वास्थ्यमा ठूलो चुनौती सिर्जना गरेको छ ।’

रेबिजविरुद्धको खोप लिनका लागि वीरगंज र आसपासका गाउँहरू मात्र नभई छिमेकी जिल्लाबाट समेत नागरिकहरू नारायणी अस्पताल आउँछन् । तर, खोप नहुँदा उनीहरू अस्पतालबाट खाली हात फर्किन बाध्य छन् ।

नारायणी अस्पतालका फिजिसियन डा. निरज सिहंले भने, ‘खोपको माग स्वास्थ्य विभागमा गरिए पनि उपलब्ध गराउन नसक्नु चिन्ताजनक कुरा हो । यो अभावले जनताको जीवन र स्वास्थ्यमा जोखिम ल्याइरहेको छ ।’

विशेषज्ञहरूले रेबिज खोप अभावले केवल व्यक्तिको जीवन खतरा पार्ने मात्र नभई समुदाय स्तरमा रोगको सम्भावित फैलावट जोखिम पनि बढाएको बताएका छन् । स्वास्थ्य विभागले यस खोपको नियमित आपूर्ति सुनिश्चित गर्न नसक्दा सरकारी अस्पतालमा भरोसा राखेका सेवाग्राहीहरू निजी संस्थामा धाउन बाध्य भएका छन् ।

अहिलेसम्म पर्साका सरकारी अस्पतालहरूमा रेबिज खोपको अभाव कायमै रहँदा स्वास्थ्य प्रशासनमा तत्काल कदम उठाउनुपर्ने आवश्यकतालाई विशेष रूपमा औंल्याइएको छ ।